Caggal nde Obama yahi Ejipt (Ƴeew Fooyre Ɓamtaare 66), o fayi ko Akraa Ganaa). Ko toon o waɗi diskuur makko nayaɓo ngam hollitde politik makko paytuɗo e jotondire winndereyankooje. Caggal nde o waɗi diskuur makko, o yilloyiima nokku ina Cape Coast, hakkunde mum e Akraa ko 140 km. Ko ɗoon “ jiyaaɓe ” dahetenoo, ine paynaa Amerik mbaɗetenoo hade mum en jolneede e laaɗe. Jom suudu makko, hono Michelle Obama, ɗoftuɗo mo e nguu ɗoo njillu maa waaw yiyde nokku ɗo taanum en njoldunoo. Kanko Oboma o yettii Akraa ko ñalnde aljumaa 10 suwee 2009, omo wondi e jom suudu makko e sukaaɓe makko rewɓe. Jaɓɓii mo to kanndaa to ko hooreejo leydi ndi horo John Atta-Mills. Obama suɓii naatirde Afrik (idaaɗe yillaade) ko leydi ɗo “demokaraasi e ndimaagu tabiti ” e wiyde gooto e hoohooɓe politik Amerik. Kanko Obama e hoyre makko, o seedtiima wonde addani mo suɓaade ndii leydi ko “deeƴre mum” e “ yiɗde hollitde faayiida gonɗo e gardagol moƴƴol leydi ndi arɗoraa ”. Hade makko ummaade Itaali fayde Ganaa ɗo o tawtortenoo batu G8 o hollitiino wonde “ Gooto e sababuuji gaddanɗi mo yahde Ganaa ko demokaraasi moƴƴo gonɗo toon o, kam e persidaa pellitɗo haɓaade mbuuñaari, nokku ɗo no ƴellitaare faggudu maantinnde teskaa ”.
- Advertisment -