Bojel ina yaha tan haa yiyi rawaandu e waandu ina ngondi e nder galle. Rawaandu ina lelii, waandu ina tenna ɗum. Bojel ndaari haa juuti, jali haa yoori kos, haa gite mum ngaddi gonɗi, foɓɓondiri juuɗe haa juuti, fawi junngo mum e hunuko, wiyi : “ Ndaw ko haawnii ! Cehilaagal waandu e rawaandu yaha haa yettoyoo tennondiral ! Eh, ɗum mi sikkaani so ina juuta ! Cehilaagal waandu e rawaandu. Miɗo waawi waɗde junngo am e noorngal hakkunde ɗoo e maggal bonde ”.
Ndeke waandu nanii mo, wiyi mo : “ juuta noppi, mi nanii ko kaal-ɗaa koo. Ko haɗata cehilaagal amen juutde ? Sibu ko denndinatnooɗo min ladde oo waɗi haa min ceholondiri ”. Rawaandu fawi heen, wiyi : “so rawaandu iwii wuro waroyii waandu ladde, ko joom gese en ndewdaa ɗoon. Rawaandu alaa ngesa, anndaa ko woni ngesa, so warii waandu baɗte bonnii ngesa, ko joom ngesa renndini ɓe. Nde wonnoo o jolaama yo min ngon sehilaaɓe, o waɗii feere ha min ngonii sehilaaɓe, haa min mbaɗtii tennondirde.
Waandu e rawaandu so kaɓii, won ko waɗi ha ɓe kaɓnaa, ko mbele ngesa walla falo ina hisnee. Geɗal rawaandu e ko heɓetee e ngesa walla e falo koo ina famɗi, kono ko ko huutortee. Kawral amen ɗoo e cehilaagal amen ngal, won ko faanditoraa heen. Ko gadduɗo min ɗoo oo anndi ɗuum. ”
Waandu heɓɓitii wiyi : “ so waandu e rawaandu ngoppidaama, kaɓataa. Kono ko renndinteeɓe yo kaɓ, nde ɗum jojji kala, mbeldita yo soklaa yo mbeldit kala, nde wonnoo ko ɓurɓe min hakkillaaji pewjanta min, so ɓe njiɗii yo min kaɓ e dow nafoore mаɓɓе, ɓе kaɓna min, so ɓe njiɗii yo min kawrit e dow nafoore maɓɓе, ɓе kawridina min. Ko nii tan e ko jaasi nii. Mo alaa feere hoore mum, ko jogiiɓe peeje koye mum en pewjanta ɗum ! ” Wonaa Juuta noppi ?
Sileymaani Kan
