Jaabawol Mawɗo Baadi e naamnal Jokkere tonngoode 43 … Mawɗo Baaɗi naamnanooma, wiyaa « hol ko mbiy-ɗaa e moƴƴuru alaa e mbayɗi, so wonaa ndu bonnaani ngesa maa ? » Mawndu bayɗi jali haa yoori, haa leƴƴitii, ruttii kadi foɓɓi, serkiti jaleeɗe, wiyi : – « Ɗuum, ko joom gese en mbiyi noon, goɗɗo alaa ! Jaabawol am e ɗuum soklaani miijeede, hatojinaani e ñippude gite, e majmajnude ɗum en, ko e boowal ngool jaabawol woni ! Ɗum ne ko ngol puŋŋiniingol haa no feewi, te entaaɗo e amen ina waawi jaabaade ɗo joom gese en, alaa ko haali haala kellifaaɗo e amen, saka miin nayeejo joom duuɓi, mo golwole hakkunde mum e joom gese en e pale ina keewi, limotaako. Mi wiya jaabawol am e ko ɓe mbiyi ko, aan naamniiɗo o, aɗa anndi, sabu ko a jaayndiyanke ŋanaa, ko a anndi naamnii ! »
– Bojel Kummba : « Ko ɓuuti hollirii ! »
– « Hol ko njaabotoo-mi joom gese en, so wonaa moƴYo alaa e joom gese en, so wonaa mo bayɗi ñaami e ngesa mum ! Jooni noon gasaani ! Jaayndiyanke ŋanaa, aɗa anndi, aɗa yenanaa, addi ɗumɗoo ko waasde hawrude e faamondirde, e yiyde geɗe no poti woorude, no poti wayde haa ɗum jibini koɗdigal ngal welaani. Nde woodnoo sagooji amen e sagooji maɓɓe ina mbeeyondiri. Waɗi ɗum, ko joom gese en njiɗani min ko, wonaa ɗum min njiɗani koye amen, minen bayɗi. Sabu ɓe mbiyi yo ɓe njey wuro, ɓe njeya ladde. Ɗuum noon aamnotaako, gasataa, wonataa ! Wonaa haalooɓe Yoƴɓe mbiyi ko « rennduɓe peccat ? » Maa wonaa ? E dow ɗuum, ko joom gese en mbiyata ko, yo coppu leɗɗe, nduppaa ɗum en, mbaɗa ɗoon gese e nammbeeli, etee ina nganndi, ina njenanaa leɗɗe ɗe ɓe mbari ɗe, ko ɗeen ngoni gese amen, ɗe min nguuri e mum en ; e faawtaade e ɗum ko kañnje ngoni koɗanɗe, ɗuwata min e jaangol, e haa teeŋti heen e nguleeki, mbiya « wata ɓado-ɗee, wata memee, bayɗi ! » Ɓe nduttoo kadi ɓe pawta heen mbiya min moƴƴaani. Ndaa tooñannge, ndaa njennoor. Ko geɗel gootel min mbiyata joom gese en, ngel alaa ɗiɗaɓel : « Ngoppee ladde amen, min ngoppa gese mon ! Min ngaraani wuro, ko onon tawi min e nokkuuji amen ! Bonnuɗo ladde amen kala, min mbonna ngesa mum ! Ina raɓɓiɗi, ina faamnii ! » (Haaɗii ɗo, haa tonngoode aroore).
Suleymaani Kan, Nuwaasoot, 23/01/1999.
Umar Mammadu Lollirɗo Suleymaani Kan
