Sammunde jokki yeewtere nde wiyi : « Banndiraaɓe, minen cammule, ko deedi muusaɗɗi tampini min jooni : ndeke noon, mi anndii woni sabaabu oo nafi, ko ko rufeete e laddeeji ɗi ko, ko mbaylaandi, ndi mbiy-ɗon ndi, feewni ɗuum.
Ko naamnal : holi safaara majjum ? So ina woodi, miɗen ñiɗi anndunde, so woodaani, yo nde fewjane, gila minen kam min momtaaki e ɓesngu winndere nde; min ngabboo ɗiin ɓesnguuji ɗi aawdi mum en heddaaki hannde e wertaango men ngo, tawi saabii ɗum ko hono geɗe ɗeeɗoo, walla ko nanndi e majje. Mi waɗta konngol am e konngol.
Ngirja : « yoo bootaajiɗi mbaɗe ñaamde jaaynge, haa ɗi laaɓa. » Ciilal heɓi konngol, wiyi : « Banndiraaɓe, wiyaama « Mo woni kala ko ndu fiyaa ndu uumata ». Minen Ciile, e kala ndaddooje, rafi ndogu reedu ina tampini min kaaɗdi. Mi faamii e ndeeɗoo yeewtere heewndefaayiida e nafoore, woni ndeke sabaabu ndogu deedi amen ɗi, hono no laaɓa reedu Sammunde wiyi nii, ko ngukkaandi baylirɗi careteendi e laddeeji ɗi. Cammule, e ndiwri ñawni, minen min connga ndi, min ñaama, ɗuum raaɓa min, dogna deedi amen, wara ko heewi amen. Ɗuum dee ina soklini min haa heɓi soksoknde. ɓiyaama » So aɗa nana, nan jam ». Ko nan-mi e ndeeɗo yeewtere dey, welaani nofuru. Kono kadi wiyaama : « So bone tintaama, fuuyii « . Kono woni fuuyde ko fuuynude ko fuuyaani. Kala ko ina usta nguura, walla ina bonna ɗum, woni sato fof, ndiyam e puɗi, e ko jokkii e ɗuum, ko boni ɓuraani ɗum. Ko boni ɓuraani ko bonnata puɗol, ko wuurni ko foofata kala. Joom en hakkilaaji ndañii golle koy ! »
Rawaandu heɓɓitii yewtere nde, tee ko hakkille keɗoriimi nde. Mi faamii nde no feewi sanne. ko e wuro koɗ-mi, ko e yimɓe koɗdu mi. Tee nganndon wonaa ɗaminaade juutni hunuko am, sabu worɓe yontaaɓe nan ɗo, kunuɗe mum en ko juutɗe, wageeɓe nani ɗo, kunuɗe mum en ko juutɗe, kono wonaa ɗaminaade juutni kunuɗe mum en, sabu nguuri ko e doole mum en oole. Miin ne, wonaa ɗaminaade juutni hunuko am, sabu nguur mi ko e doole am oole. Lonngel ngelkeɓat mi ngel, ko batte warñeende am, e tampere am, wonaa sabu mbaydi am, ko sabu nuunɗal am.
Sanngalde heɓti konngol e juuɗe Rawaandu, wiyi ɗum : « Jaane-Rawaandu, a yaltii lowre yewtere nde, artu e mayre. Rawaandu wiyi : » Miɗa ara. Bonnude ngesa, e bonnude nguura njanana, e janfaade joom gese en… (tan Buubu-ɓayndu yowi junngo, ñaagiihakkunde laañe, sabu ina anndi Rawaandu ko kañum o mallata, tee mallol ngol sañtii jubbol. Jaabaade ngol waɗɗiima. Kono gardiiɗo yeewtere nde, hono jaayndiyanke Ranaa, Bojel, jaɓaani rokkude mo hakkunde laañe ɗe, nde wonnoo ina anndi ko woni heen !Sabu ɓayndu yennii Rawaandu, wiyi juutni hunuko mum ko ɗaminnaade ko jogoraani dañde haa darnga. O wiyi : » Rawaandu, jokku ! »)
Rawaandu wiyi : » Yeewtere nde, nafoore mum alaa ɗo haaɗi, ngati nde fenñinii ɗo sababuuji gasduɗi lor, wonande puɗi, nguura kala ko waɗi fittaandu e ndeeɗo duunde nde ngon ɗen. Ko seeɗa nganndu ɗone tanaaji bootaaji ɗi. On njiyaani paɗe kiiɗɗe, e tekke ñolɗe, e dakke cukuli cañtaaɗe, e laalaaɗe lehe beddaaɗe, e potuuji, e satallaaji, e saakuuji kiɗɗi, e dokke e jine, jine tuundiiji goɗɗi e ndiyameeje footiŋaaji guppol, e lawƴameeje, e gaasuuji, e esense, e gudoroŋaaji, e cuurkeeji luuɓɗe, paɗɗooje, e ko wonaa ɗuum goɗɗumhaa heewi, mi limtaani jiibeeji nayi, e beyi, e baali, e dawaaɗi, e ulluɗi, e gertooɗe, e ñamalleeje dufaaɗe, ñolɗe ; ɗuum fof ina haɗi min hannde foofde, haa min kebbina bumsuɗe amen henndu laaɓndu, seniindu. « Jawɗo ko ɓeeɗɗo ». Min ndañataa ko njawaton ko, so wonaa nde min njalti gure ɗe. Jiibeeji ɗi mbiyɗon ɗi, min memataa kuuseeji ɗi, batte bootaaji e tekke ñolɗe, e geɗe ɗe hay gooto waawaa sifaade ɗum en, ɗe mbaylaandiji peewnata, ina cara e aduna o. Ndeereeru ina haayɗini yimɓe, nuunɗal waɗtaama fuuyre. Dañal no ardi kala ina moƴƴi, so yiɗii yo leɗɗe ngas, ɓe ngondaaka, yo ɗe mbare, ɗe mbaɗtee ƴulɓe, yeeyee ; huɗo daɗaani, taɓɓere e yaaɓere, e yellere kaalaaka. Bone baawɗo jiiɓeede leyɗeele goɗɗe, ko o waawi wonde kala, o addete, omo juloree.
Oom laaɓi ! Mo feewni mo ? Hol nde o feewnaa ? Hol nde o huutortee ? No foti dummunna o foti huutoreede e mum, so ɓennii o nattii moƴƴude ? Ɗee geɗe fof ɓe ngondaaka ! Yo yimɓe cellu, ɓe ngondaaka, alaa ko haali haala kuɗol, walla kullel gonngel e wuro, saka e ladde ! Mi wiya kala ɗo nuunɗal alaa, jam wonataa ɗoon. Daande am ko dow, ko e dow duɓɓi nayeewi ndarii mi, yo mo woni kala suɓo nuunɗal : kulle e haa teeŋti heen e aadee en.
Kala ɗo nuunɗal alaa, ko tanaa wonata ɗoon. Mi wiya yo yimɓe ustu ndeereeru mum en ngu, so wonaa ɗuum ngu addana ɓe ko ɓe nganndaa, ɓe njooɗtoraaki. Maale mum puɗɗiima feeñande en, sabu ɗe njaltii ɗo, e ndeeɗo yeewtere. On njaaraama. Rawaandu foɓɓanaa no feewi. Kono ko ɗo yeewtere nde yowii haa yeeso.
SULEYMAANI KAN
