Barak Obama hooreejo Dental Amerik. Ngol woni gadanol fottude ɓe gila laamu arti e juuɗe Natanyahu. Ɓe njeewtii e toɓɓe ɗiɗi : Iraan e jotondiral hakkunde Israayiil e Palestiin. Barak Obama teeŋtinii yiɗde mum yo Palestiin sosane dowla, kono Natanyahu jaɓaani yortaade, sibu o jaɓaani haalde heen ko laaɓi. Ɗum noon luural maɓɓe e ndee toɓɓere ina feeñi sanne. E wiyde Obama : “ Nanondirde e goodal dowlaaji ɗiɗi (dowla Palestiin e dowla Israayil) wonaa nafoore Palestiin tan, ko nafoore Israayiil, e Dental Amerik e winndere ndee kala ”. O siftini kadi wonde nanondiral 2003 ngal ina wagginnoo “ Israayiil yo dartin ko teettata leyɗe palestiinaaɓe ko ”. Wonande Obama, luural hakkunde Israayiil e Palestiin ina himmi no feewi ngam moƴƴitingol jotondire hakkunde Amerik e leyɗe juulɓe. Ina teskaa haala maɓɓe paytuka e Iraan juuti no feewi.
Wonande Israyiil, so maslahaa dañdaaka e Iraan haa woppa tuugnorgal mum jowitiingal e kaɓirɗe nikleyeer, maa huutoro bommbugol won ɗiin nokkuuji e nder Iraan. Eɗen teskoo tan ceertugol jiyle e golle hakkunde Obama e Bush ko fayti e ɗe geɗe ɗiɗi ɗee kala : luural Palestiin-Israayiil e Iraan. Hakkunde Israayiil e Amerik noon, kamɓe fof e jiydude walla ballondirde nafooje, Allaahu ya’alam, ellee, gila Obama ari, woni ko e waylaade. Sibu, e ko wattindii ko, Amerik daɓɓirii Israayiil nde siifata ‘piɓondiral ustugol kaɓirɗe nikleyeer*. Goo ko ɗum waɗa, sibu hay gooto (leyɗe hirnaange) meeɗaa joopaade Israayiil feɗeendu, alaa ko haali wiyde ɗum yo siif ngal nanondiral. Ko mbaaw-ɗen wiyde tan, Obama, won kesam-kesaagu fuɗɗii naatnude e jotondire winndereyankooje : gila e udditgol Kubaa, haa yettii haala makko ɗo o hollitta yiɗde Amerik nanondirde e leyɗeele juulɓe, haa yettii goongɗinde jojjugol cosgol Dowla Palestiin, haala makko feewde e Iraan. So ɗum laatiima, o jokkii o dartaaki, ina waawi deeƴre laatoo hankati e winndere nde.
