Hooreejo teddungal Catal Fedde Ɓamtaare Pulaar e Muritani Kayhayɗi, Sammba Gata Bah janngii jannginii pulaar, daraniima, ɓamtii wiɗtii, winndii defte e pulaar. E konngol Abuu Aamadu Joop gorko mo Likseyba Gorgol, o yettinii teddungal fedde Jeeriyel feewde e ngalɗoo jaalal leñol, daraniiɗo pulaar gila ko ɓooyi, ligganiiɗo pulaar. O weeɗii mawɗo Sammba Gata Bah soomdu ina waɗi 30 000 mbuuɗu, ɗum woni ɓoornateeri fedde Jeeriyel waɗani mo.
Ndeen yimɓe ɓee ngottiima, denndaangal gure garɗe ɗee, gooto fof jaarii jiingenaaɓe e teddungal ngal, kollii weltaare mum, ndokkii wasiyaaji mbele golle ɗee ina mbaawa duumaade. Ibaa Bilaali Sal, gooto e ardiiɓe fedde Jeeriyel joofnirii golle ɗee yimre jeeriyel. Tummbite deftere nde Profeseer Mammadu Yuuri Sal winndunoo e ɗemngal farayse mbaawii hokkireede e dental ngal. Duwaawu sakkittaama.
Ceerno Njaay Saydu ɓamii konngol ngam jaarde tawtoraaɓe ɓee fof. Golle ɗee njooɗii, njuɓɓii, peewii. Aadi rokkondiraama mo wuuri so Alla jaɓii.
Usmaan Ñaan, Kayhayɗi
