Hammadi e Yerel ko aynaaɓe baali, tee ko sehilaaɓe Hammadi e Yerel ina njooɗii ina njeewta, haa ɓooyi Hammadi naamndi Yerel
Hammadi : Yitere Amadou ndee wojjaani ?
Yerel : A nde wojji kay no feewi !
Hammadi : Nde muusaani ?
Yerel : Ko anndinta mi ? So yitere maa muusii ko miin anndata ?
Hammadi : Ñawuu, ko anndin maa a nde wojji koo, ronkataa anndinde ma so nde muusa ! Ko muusi kay jiyɗo fof ina anndi ! Ko ɓawlude reedu tan ngondu-ɗaa, wonaa ko ɗum haɗi cehilaagal men welde.
Yerel : Aan ko haɗ-maa anndude so nde muusa tawde ko yitere maa ?
Hammadi : Ñawuu, a yiyrii kam daarorgal ? So mi yiyii no nde kay mi naamndotaako ma. Eɓe nduka ha ɓe cooynii
Sammba Kumbayel ina ara. O ari haa o ɓadii :
Hammadi wiyi : Ciilal Sammba wela jibinde, wela miñnude, miɗo taƴori ngoo mooso ko kabaaru belɗo addori ; hol ko ñalli wuro ?
Sammba wiyi : Neene yahii janayse maama Aamadu ; Baaba sellaani ko jiimaaɗo, ñalli ko tuutde. Maham en yahnooɓe saaynoyaade Jaaƴe, ngartii keɓaani debbo, ina piyaa haa mbayi no wiro ɓursaako nii…
Hammadi wiyi : ko oo kabaaru bonɗo woni ? Woowi kay ko saaynoyinooɓe ngartii keɓaani debbo, kono piyee kadi ! Ɗum dey woni dañaani, dañora !!!
(Yero Dooro Jallo : « Ndikkiri Jom Moolo »)
