Porfeseer Alfaa Ibraahiima Soh to Gine Hay mo anndaa mo ne nanii mo, sibu ko o ngenndiyanke mawɗo o wonnoo. O jeyaa ko e adiiɓe daranaade ndimaagu Afirik, tee ko o soofaa mo hono mum weeɓaani so artii e daranaade ɗemɗe ngenndiije, haa teeŋti noon e fulfulde (Pulaar).
Caggal nde joofni jaŋde Ɓuraana, o naati lekkon, o waɗi ko duuɓi 3 fat e jaŋde leslesre (6 foti wonde). O heɓi Bakkaa makko ko aldaa e caɗeele. O naati Uniwersitee Ndakaaru e hitaande 1956 ɗo o ardii kareeli sanɗaaji ngam jooltugol hujjaaji mum en e daranaade ndimaagu Afirik. O jokki jaŋde makko rowrowre to Pari e hitaande 1960 ha o woni Porfeseer karallo ko fayti e ɗemngal fulfulde ngal o janngini duuɓi keewɗi to » Duɗal Ngenndiwal ;emɗe e Pine fuɗnaange » (Institut national des langues et ciɓilisations orientales, INALCO to Pari), tawi omo jokki haɓanaade jooltugol hujjaaji sanɗaaji Gine to Farayse. Ko o winndi e defte wiɗto e ɗemngal Pulaar ina heewi no feewi. Ko o ngenndiyanke mawɗo, ko neɗɗo ɓamtaare sibu o jeyaa ko e adiiɓe luulndaade fenaande laamu Seeku Tuure.
Alfaa Ibraahiima Soh nawdetee ko e Aamadu Hampaate Bah en e hono mum en. Porfeseer Alfaa Ibraahiima Soh sankiima ñalnde 21 saawiyee 2005 tawi ina yahra e duuɓi 72. Yo Alla yurmo mo yaafoo mo. Ma en ngartu e golle ooɗoo ngenndiyanke e tonngooɗe men payɗe
