Alaseri ɗimmitii
Kawgel Fuku Afrik (Coupe D’afrique des nation), ko tonngirtee CAN, ko kawgel ɓurgel yiɗeede e yeɓeede e nder duunde Afrik ndee. Ko hikka waɗti ngel laabi 32, ko ngel yuɓɓinee. Hikka noon ngel yuɓɓinaa ko to leydi Misra, tuggi 21 suwee haa 19 sulyee 2019.
Kebungal kawgel ngel
Ko ngol woni gadanol 24 kippu ina tawtoree, ko adii ɗum ko 16 kippu tan tawtortenoo. Hay sahaa petteteeɗo oo waylaama, sibu fettetenoo ko e lebbi saawiyee e feebariyee, kono waɗtata fetteede ko e lebbi suwee e sulyee. Ɗii waylo-waylooji ina njeyaa e ko haɗi Kamaruun parande ɗum, sibu nde woni 16 kippu ndee, dingire (estaduuji) 4 tan ina njonatnoo, kono ko ko wonti 24 kippu koo, alaa e sago ɗe timma 6 ko famɗi fof. Kippuuji 24 ɗii pecaa e diɗɗe 6, diɗɗal heen fof waɗi kippuuji 4. E nder diɗɗal fof, ko kippuuji ɗiɗi gardiiɗi ɗii njaltata, wona 12 kippu njaltii, heddoo 12. E nder 12 keddiiɗi ɗii suɓee heen kippuuji 4 garnooɗi tataɓo ɗii, ɓurɗi tiiɗnaade, ɗi tawta kippuuji 12 ɗii, wona 16 kippu, potɗi yahde daawal jeetaɓal (huitième).
Kawgel ngel
Caggal nde anndaa to fettetee, kuraaje mbaɗaa ñalnde 12 avril 2019 to Keer, ngam anndude hol fedde kippu fof jeyetee.
Kawgel ngel fuɗɗii ñalnde 21 suwee. Kibondiral gadanal ngal ko Misra e Simmbabuwee, ko Misra fiyi ɓe 1 e 0. Misra jaakoranooɗo maa ƴetti raay diwaani daawal ɗimmal, sibu ko kippu Afrik worgo. To bannge kippu Muritani, ɓeen kam keɓaani nii hay yaltude daawal gadanal ngal. Maruk noon ina waɗanoo yaakaare no feewi, kono ɓennaani daawal ɗiɗmal, ko ɗoon ɓe kaaɗi ; sammini ɓe ko kippu Beneŋ. E nder kawgel hee, won kippuuji kolliti tiiɗnaare mawnde, ko wayi no Benee, Afrik worgo, Tuunus e kippuuji goɗɗi ɗi en limtaani. To bannge joofnirde kawgel ngel, kibondiral cakkital, ko Alaseri e Senegaal. Senegaal fof e waɗenoode yaakaare mawnde, dañaani nawtude raay. Ɓe tijjaama ɗoo e duuɓi 2 paaɗi, sibu hikka ɓe mbaɗii toon golle tiiɗɗe, tee nde ɓe ngarti ndee, ɓe njaɓɓaama no feewi. To bannge Alaseri eɗen mbaawi wiyde ɓe ɗimmitii, sibu ko ngol waɗti ɓe laabi ɗiɗi ko ɓe naawa [1990 e 2019].
Alaseri noon ko leydi nganndiraandi waawde fuku-bal.
E nder kawgel ngel ko yimɓe ɓee mbiyata wideyoo koo, huutoraama heen, ko wiyetee VAR, (Video Assistant Referee) woni Ƴeewirgal ballowal ñaawoowo, ɗum huutoraa ko e kibondire jeeɗiɗi cakkitiiɗe ɗee. To bannge ñaawooɓe, e ngel kawgel ko ina wona 26 ñaawoowo tawtoraama, e 30 balloowo. E ngel kawgel ko ina wona 52 kibondiral waɗii heen, e 102 wallinannde wallinaama heen, kadi ko ina wona 1083 311 jeeɓoowo. Ko Alaserinaajo biyeteeɗo Ismael Bennacer waɗaa pettoowo dowrowo e kawgel ngel. Ɓuri heewde ko wallini toon ko Niiseriyaanaajo biyeteeɗo John Ighalo ballinanɗe laabi 5.
E ngel kawgel battugel 32ɓel, baɗe leñam-leñamaagu ceedaama heen. Yeru to Farayse, bargol suka ginenaajo ina wiyee Maamuudu Bari.
Aamadu Habiibu Joop
