Ndulumaaji Demɓe wuro Delliyaa, yuɓɓinii ñalɗi kaalteteeɗi tuggude e ñalnde 26 haa ñalnde 28 lewru desaambar (bowte) hitaande 2013. Njuɓɓini ñalɗi ɗii ko Dental Ndulumaaji Demɓe, jibinannde wuro ngoo, wonɓe ɗoon haa e ɗanniyankooɓe wuro ngoo. Golle puɗɗii ko ñalnde 26 bowte hitaande 2013. Tuggude e 9w30h subaka haa 13w30h caggal midi, darnde ko wootere, dadungal ko gootal, waaƴo ko wooto. Nde hoɗɓe ɓee njooɗodii haa gasi, joom-wuro wuro ngoo waɗi konngol bismaango timmungol. Nde o rowi, jonaaɗo Dental Ndulumaaji ƴefti konngol, siftini golle gollanooɓe e sahaaji jawtuɗi, no ñalɗi ɗiiɗoo kebliraa gila e peeje haa e ngalu hade mum jumpude e paandaale ñalɗi ɗii. Caggal ɗum, jatol ngenndi (hymne national) rewnaa heen hade Goomu Pinal Ndulumaaji uddirde subaka oo jime e jimɗi heedde 13w30h. Ko ɗoon jamaanu nguu ñaltoyi. Caggal bottaaje, jaɓɓungal mawɗo diiwaan oo woni e hebleede. O naati Ndulumaaji Demɓe ko 15w00h, omo ardi e seto teskinngo. Hade makko yettaade ɗo jaɓɓungal ngal waɗetee ɗoo, o inni tawo ko mbedda gooto e mbeddaaji wuro ngoo, wiyaa Mbedda Sammba Kajjaa Dem. O ɓenni kadi to galle pinal wuro ngoo ngam innirde mo Galle Mammadu Boolo Dem. Caggal ɗuum seppo ganni waɗaa ngam hollirde Jontaaɗo Fulɓe e nder diiwaan Fuuta Tooro no foti wayde. Ooɗoo fannu heewaani waɗeede walla nii mbiyen alaa tawo ɗo o meeɗi waɗeede e nder Fuuta Tooro so wonaa ɗoon e Ndulumaaji. Leeɗe nay wuro ngoo, hebli gootal heen fof paɗɗuɗo mum. Leegal Ceenel addi ko biyeteeɗo Kummba Labbo Jum; leegal Ganayel suɓii ko Ami Mbay Soñaan; leegal Beelel Maani addi ko biyeteeɗo Aminata Gaakel; leegal Ñaaɗngel labii ko biyeteeɗo Aysata Ibraa Soñaan.
Paɗɗondiral ngal ena waɗanaa goomu ñaawooɓe e fannuuji ñaaweteeɗi. To bannge geɗe ñaaweteeɗe ɗee ko 5 : tagoodi ɓanndu; ñaantungal; jaɓɓal; wicco ; mooso. Caggal paɗɗondiral ngal, Goferneer diiwaan oo ƴetti konngol ngam salminde e jaarde ɓesngu Ndulumaaji e jamaanu ndariingu nguu e kuuɓal e yamirde puɗɗagol golle ñalɗi ɗii e mbaydi laawɗundi. Caggal ɗum Goomu Pinal Ndulumaaji naati dingiral, waɗi jime e jimɗi ngam waɗde eeraango dental ɓiɓɓe Fulɓe. Njuɓɓudi ñalɗi ɗii yowi golle ko e 21w30h. Ko ɗoon gooto fof fayti galle njaatigi mum ngam heblanaade hiraande e yahdiiɓe mum. Caggal kiraaɗe ko hiirde ganni daɗɗi tuggude e 22 w 00 h haa fajiri feeri. Ñalnde 27 bowte hitaande 2013, tuggude e 9w00h haa 14w30 ko joɗnde ngam ɓulnaade ko fayti e Ɗemngal Pulaar, Remru, Ɗanngal e Ɓamtaare.
Caggal juulal, golle ɗee ɓamti. Goomuuji ɗii ngartiri golle mum en, golle ɗee caataa. Caatagol ngol duumiima haa heedde 18w15h. Ko ndeen golle ɗee ngasi. E oon sahaa tawi to dingiral too, naalankooɓe ɓee kañumen puɗɗiima golle mum en . Ngadii e dingiral hee ko Fulɓe Fuuta. Rewi e maɓɓe ko Goomu Pinal Jolof. Nde jolofnaaɓe ɓee mbaynii ko Goomu Pinal Ndulumaaji woni heen haa 21w30 h. Ko ɗoon golle naalankooɓe ɓee ndartii, yimɓe kirtoyii. Jamaanu nguu artoyi e dingiral kewuuji ngal ko 23w00h. Diɗɗe jabbaaji (rappeurs) ndeggondiri: Raasin Jah lollirɗo R J, Pakko Leñol, Mammadu Dem, Abuu Sih haa heɓi Abuu Gise. Caggal ɓeeɗoo sukaaɓe, ko jaale mawɗe ɗe fulɓe tiitortoo hannde to bannge naalankaagal gila to rewo haa to bannge worgo maayo, naati dingiral. Ñalnde 28 bowte 2013 woni ñalawma cakkitto ñalɗi ɗii. Nde wonnoo ko kanko woni mbayniigu, maa mbiyaa ko kanko ɓuri rimndude fannuuji walla yimɓe ɓee ɓuri haljude.
Ñalnde heen ɓuri doolnude e ñalawma oo ko kurmbitgol duɗal jaŋde hakkundeere wuro ngoo, ɗum woni Liisee Ndulumaaji e tawtoreede, e innde laamu nguu Mammadu Talla, jaagorgal heblo golle e Mahmuud Salleh, jiiloowo geɗe gollordu Persidaa Makki Sal… Nde ɗum ɓenni, ko lammba tiindaa e oon sahaa. Ka leelii fuɗɗaade seeɗa. Caggal lammba kaa, ko ɓuri teskinde ko ballal Mayram Fay, joom suudu Makki Sal fayde e Ndulumaajinaaɓe. O neldi ɓe ko otooji nay haa naaɗii kaɓirɗe kuutorɗe e nder jibinirɗi (matériel de maternités).
Caggal lammba kaa, ko ɓuri teskinde ko ballal Mayram Fay, joom suudu Makki Sal fayde e Ndulumaajinaaɓe. O neldi ɓe ko otooji nay haa naaɗii kaɓirɗe kuutorɗe e nder jibinirɗi (matériel de maternités). Ñalɗi ɗii ndogii balɗe tati e jammaaji mum en ko alaa e fergitere dowrowre laaɓtunde. Ndulumaajinaaɓe mbaawii kewu mum en, mbaawii kadi hoɗɓe mum en . Ko jiidaa e hoɗɓe limtaaɓe dow ɓee, gure catiiɗe ɗee, alaa heen heddiingo ngo araani. Ñalnde 28 ndee, Goomu Pinal Ndulumaaji teddinii en teddungal mawngal waɗani en beetawe keeriiɗo gittanɗo en sunu, mette e nimsa laawol Kameruun. Ñalnde heen en njiyii ñaantungal ngal weeɓaani sifaade, en keɗtiima njimri mbelndi e haala njuɓɓuka, ka fusataa ɓoccooɗe noppi.
Gelongal Fuuta lollirɗo, Njaay Saydu Aamadu
