To diine : Hol no diine lislam yiyri rewɓe ?
E nder diine ina teskaa rewɓe teddineede heen no feewi. Nde tawnoo ko rewɓe ngoni jaalal nguurndam. So ɗuum ɓennii eɓe ndokkaa hakkeeji maɓɓe kala haa timmi e banngeeji kala, ko wayi no : ligaade, ɗannaade, reseede, seereede, janngude, jogaade ngalu. ekn. Kono e nder renndo men ina heewi to rewɓe nanngiraaka no fotiri nii, yeru : to jaŋde haa hannde ko worɓe ɓuri heewde heen nde tawnoo ɓeya ne ŋakkiree dañde jangde no haanirta nii, eɓe ngoppa law sabu dewle gila joomumen ina pamɗi.
Ɓee heen njibina, ɓee heen ngopiniree doole, ɓee heen sibu gorko oo yiɗaa debbo jannguɗo, ɓee heen ko sibu esiraaɓe ɓee, ekn. To ŋiima : ina famɗi to njiyi-ɗen Ceerno debbo e nder renndo men etee ne kayne diine harminaani ɗuum, kono ko renndo men tan ina ɗeɓi fuuynude ɗuum, ina heewi to keltudon ɓe : yeru kon ndewon, maa walla mbiyen huu « ceerno debbo »…ekn.
To liggeyaaji : Rewɓe men haa hannde ina limoo e heen liggeyaaji ko wayi no ardineede heen e golle toowɗe, tawi e nder renndooji goɗɗi en njiyii to ɓe ngardotoo tee ɓe peewna haa moƴƴa, haa ɓura so gorko ardinanooma nii.
To dewle : ina teskaa 70% debbo e nder rewɓe ko dewle muusɗe nguuri nde tawnoo ko ɓuuri heen heewde tuugnaaki nii e diine, saka e neɗɗankaagal, alaa » ko miin woni gorko, ko miin duhii tuuba tan, ko miin waɗata no njiɗir-mi, no mbeliraa-mi, yeru, heewii to gorko huutorii tenge debbo oo, tawi o tintinaani nii, haa e nder nguurndam nder galle fof ko kanko tan, eno o yiɗiri.
To hakkeeji ina famɗi to debbo rokkaa no fotirta nii, sibu ñalnde fof njiyen nawligaaji ɗi tuugnaaki e diine : gila e baasgol fotndude haa e waɗde tawa waɗiraani sabaabu tiiɗɗo, alaa “ ko mbiɗo yiɗi tan, mbiɗo waɗa ” tawa dañal yettaaki ɗoon ; tawa aɗa foti toppitaade geɗe goɗɗe ɓurɗe tiiɗɗe e nder diine, ko wayi no njuulu timmungu, ko wayi no askude, ko wayi no hajju, ko wayi no sakkaade. ekn. Aɗa foti toppitaade ɓesngu to cellal mumen, to jangde mumen, to dañal mum en, tawa debbo hay huunde alaa ko timmin-ɗaa e hakkeeji mum en.
Wasiya : tiiɗno-ɗen e rewɓe men haa mbaawa yahdude e jamaanu waylowaylo hannde oo, tawa ina ngonndi e diine mum en, e neɗɗaagu mum en tawa luutndaaki aada mum en. Ɗuum noon eɗen poti ƴewtaade renndo men no feewi sibu ko heewi ko ñawi ina e maggo kono noon ɗuum firtaani kadi en ngalaa ko moƴƴi. Alaa, njiɗ-ɗen tan ko yahdude e jamaanu hannde oo, tawa noon en ngoppaani ɓure men moƴƴe haa teeŋti noon e diine men.
Buuɗi Soh
