Ko jaayɗe kadi kaali ɗum. Ɗe mbiyi wonde hakkunde Muritani e Maruk ina waɗi caɗeele seeɗa… Iih ndaw ko haawnii ! Nde Abdel Asiis waɗi kuudetaa mum ndee, Alaseri jeyanoo ko e ɓe jaɓaano heɓtinde e jaɓde ɗuum. Maruk noon, ko toon woni iwdi makko, ko toon kadi o waɗi heblo makko koninkaagu. Kono ellee ko o jejjitɗo ɗum fof hannde, sibu hakkunde makko e Alaseri, wirnaawo nattii woodde ɗoon, ellee boom ko mbelemma e gollondiral ɓuri maantinde heen. Haa teeŋti noon gila Islaamiste en keɓti rewo Mali ina njeysa. Won wiyɓe, » Abdel Asiis ina anndi ko Alaseri jogii coktirgal hare feewde e islaamiyankooɓe ɓee, Ma a taw ko ɗum tagi mo welnaade Alaseri « .
Ngarten e kereƴ kaaleteeɗo hakkunde Muritani e Maruk oo : Jaayɗe ɗee kollitii wonde Maruk ko ko saɗtinani Muritaninaaɓe sarɗiiji binndagol e janngirɗe mum, muritaninaaɓe ne ina ɓeydoo hiisde e Maruknaaɓe naatooɓe leydi men… Ko waawi heen wonde fof, en puɗɗiima woowtude » tikke hakkunde Abdel Asiis e heediiɓe mum » : idinoo ko Tumaani Tuure (hafeere ownooɓe) e Abdullaay Wad (hafeere diwooje e otooji) e Alaseri, rewi heen ko Makki Sal (hafeere kayitaaji…).
Eɗen keewi wiyde dey » woowi kay ko ko mbaɗ-mi kaari, kono ko mbaɗ-mi teheende fof ? Ƴeewto so wonaa e maa woni !
Bookara Aamadu Bah
