Heewɓe ina kaawaa ko sukaaɓe hannde njornata tuubaaji mum en koo; woɗɓe kadi ina coofaa ɗum ; woɗɓe njaggiri ɗum tan ko geɗe cukaagu…
Ko waawnoo heen wonde kala, ko ɗum huunde yaajnde no feewi, huftodinnde boom. Tee, ina hasii, farnortooɓe ɗum ɓee, njiɗi ñemtinde ko ko wiyetee “sagging” woni yornude tuuba. E nder kasooji Amerik, dummbaaɓe ngoppidtaake e duhi, walla ɓorɗi paɗe sabu huleede hoto kuutoraade ɗum ngam waɗde koye mum en yargo walla waɗde woɗɓe yargo. Nii woni, nde tawnoo alaa ko jaggi tuubaaji maɓɓe, ɗi ngona e yorde. Yoga e mаɓɓе, hay so njaltii kasoo, kankadi tawata ko ngoowii yornude tuuba, keddoroo noon… Nii woni hay ɓe meeɗaa naatde kasoo, kam en ne mbadti ɗi yornude. Ɗum ɓuri fof yaajde ko e nder sukaaɓe ɓaleeɓe Amerik.
To dowla Folorid (Amerik) sariya ƴettaama, karminoowo jornugol tuubaaji ina hollita cakkal walla terɗe potnooɗe suureede. Oon sariya wiyetee ko “ɓamtee tuubaaji mon”. O ɓuri joopaade ko sanɗaaji e koltu potngu ɓoorneede e nder janngirɗe. E mijo ƴettuɓe oo ɗoo sariya, “so cukalel naatii duɗal, hakkille mum foti heedtude ko e jaŋde e faggaade ganndal, kono wonaa e kettuki comci walla e geɗe jalniiɗe pooɗtooje hakkillaaji sukaaɓe, kaɗa ɗum en waɗtude hakkille he ko njanngintee ko”. Oo aadaa noon ɓooyii dukeede e leydi Amerik hee. Obama wiyiino, nde waɗata kampaañ mum nde, wonde “gure jiɗɗe haɗirde ngoo faaro laabi sariya, ngalaa haaju, kono tan omo wiya “sukaaɓe ɓee yo ɓamtu tuubaaji mum en».
Bookara Aamadu Bah
