So fettooɓe bal ina kaalee, Samuel Etoo jeyaa ko limteteeɓe hoore. E ɗii ɗoo duuɓi kala, o fettatnoo bal e kolob biyeteeɗo Inter Milan (to Itaali). Jooni noon, oon kolob luɓii mo kolob Riisinaajo gooto ina wiyee Anzhi Makachkala, fotde duuɓi tati. Njaru luɓal-coodgu ngal ko miliyoŋaaji 27 oroo (miliyaaruuji 10 ugiyya). Heddii ko haa cellal makko hoolkisee. So ngal daawal yawtii, kanko wontata pettoowo bal ɓurɗo mawnude njoɓdi e winndere ndee, fotde 600 miliyoŋ ugiyya lewru kala. Nii woni o ɓurtoo Cristiano Ronaldo (Portugeec) e Lionel Messi (Arsantiin).
Jeyi oo ɗoo kolob ko gorko keewɗo jawdi ina wiyee Suleiman Kerimov. Ko sabu ndiin jawdi addani oon waawde fooɗtude e kolob mum fettooɓe bal mawɓe wayɓe no Roberto Carlos (Beresilnaajo) walla Mbarek Boussoufa (Maruknaajo) walla Youri Zhirkov (Riisinaajo). Maa Etoo taw toon fettooɓe bal afriknaaɓe tato : Benoît Angbwa (Kamaruun), Aali Kebe Baay (Senegaal) e Abdulahi Eliakwu Isah (Niiseriyaanaajo).
