Hade ɗuum, ñalnde 21 settaambar 2019 ndee, Senegaal ne waasiino jimoowo ŋanaa, naalanke dowrowo, lolluɗo, hono Samb Jabare Samb, jibinaaɗo e hitaande 1924 (o sankorii waɗde ko duuɓi 95) nder galle awluɓe.
Samb Diabare Samb lollirnoo ko « baayu ndaanaan yi » (baaba mum naalankooɓe). Unesco rokkii mo, e hitaande 2006, tiitoode « Ngalu aadeewu nguurngu », kanko e Sosef Njaay (1922-2009) deenoowo Galle Jiyaaɓe duungel Gore, e Duudu Njaay Roos cankiiɗo e hitaande 2015. Ɗuum ko seedtaade faayiida golle maɓɓe diwtii keeri Senegaal, sibu naworii aadee en kala. Samb Jabare Samb ko koɗoowo hoddu ŋanaa, ko ganndo askooji, ko gawlo mantoowo, ko jeewtoowo ganndo renndo, paamɗo aduna, ko daartoowo, ko jimoowo belɗo daande. Omo jeyaa e lollinɗo gaaci Senegaal e nder winndere ndee.
Kanko e Siddati wul Abba luttuɓe balɗe, ɓe ndaɗondiri ko balɗe jeegom fat !
