Ko fodanoo yettiima. Maki Sal ɗekkii kala ko o joganinoo heerto PDS, haŋki 10 Nowambar 2008. Kewe ɗiɗi mawɗe ndillinii hoohooɓe dawrugol leydi Senegaal no ngoorunoo. Nulaaɓe Jakkaa Ngenndiijo ndenti haŋki 10 nowambar gila subaka haa takkosaan (laasara).
Ginol golle maɓɓe ko ƴeewde no Maki Sal ittiraa Hooreejo Jakkaa Ngenndiijo Ndenndaandi Senegal. Nde ɓe « ngooti », 112 ngonani ko yo itte, 22 calii. O ttiima, gasii haa laaɓi toy. Pr Iba Der Caam, halfinaama e mudda gardagol Jakkaa o, ko adii nde goɗɗo fiilatee. Ina nyohee noon ko Amina Taal, maa Joseph Ndong, maa Moodu Jaany Fadaa… Ɗum fof noon ko « nan-Alla » tan. Goonga o, fof woni ko e juuɗe Abdullaay Wad, Hooreejo Dowla Senegal.
E oo kiikiiɗe 10 Nowambar, nde Jakkaa “wooti” hay gayni diiwgol Maki Sal, kaŋko ne o noddi jaayndiyaŋkooɓe galle makko. O heɗni ɓe konngol juurnitiingol darned makko e hereto PDS. O teskii ko waɗaa ko ko janfa, o hollitii hare diindinaande e makko, kaŋko e ɓaɗtiiɓe mo. Ɗum fof ko yiɗde “falaade mo ɗaɓɓude hooreyaagal leydi so piilgol yontii”.E dow ɗuum, o habri kaŋko ne o “yaltii PDS e kala ko hebrunoo PDS”. O ɗekkii wonde mo Nulaaɗo PDS to Jakkaa (“depitee”), o ɗekkii kadi wonde mo “meer” Fatik, wuro makko. O fellitii kadi sosde yuɓɓo juurnittooɗo darned makko e dawrugol leydi ndi.
Nulaaɗo Jakkaa e innde PDS, “awoka” biyeteeɗo Aliyuun Badara Siise kam ne ɗekkii. Maki Sal halfinii mo yo renndin wondiiɓe maɓɓe, ɓe ƴeewa neo ɓe ngollortoo : so tawii ɓe cosat hereto woɗngo, maa ɓe naata e hereto woodngo. Gila dille ɗe puɗɗii (rawane), ko jooni Maki Sal haali heen. O wiyi « So mi muɓɓii hunoko am haa jooni, waɗi ɗum ko ngonnoo-mi ko e ƴeewtindaade ɗo ɓiɓɓeyumma am en PDS kaaɗata…». Ina teskaa noon, nder dille oo nyalawma fof, Saada Njaay, laatiiɗo sabuubu ɗee kewkewe fof, araani, tawtoraaka, muumɗii no piyaaɗo hello e hunoko.
