Naalaŋke Senegaalnaajo lolluɗo oo, hono Yuusu Nduur sosii eɓɓaande wiyeteende « Birima »: omo ñamla waasɓe ɓee kaalisaaji ngam siynude eɓɓooje mum en mbele ena njalta e baasal. Eɓɓo ngoo inniraa ko laamɗo gooto Senegaalnaajo ena wiyee Birima Birima. E wiyde Yuusu, Birima ko laamɗo moƴƴo wonnoo, jokkoowo enɗam, « jiɗnooɗo gaaci »! Yuu ena fammina saaktooɓe kabaruuji. Eɓɓo ngoo fuɗɗortoo e 200 milioŋ kaalis Seefaa ngam wallude yimɓe lohɓe wayɓe no fitiram golle en, naalankooɓе e wiyde hooreejo eɓɓo ngoo lbraahiima Cuun.
Ɗeen ñamaale pawii ko e hoolaaree aadi hakkunde maɓɓe e ñamlotoobe ɓee. Yuusu wiyi waɗi ɗum ƴeftude ngoo eɓɓo ko anndude dokkal ɓolal wallataa waasɓe sabu so ɓe ngaynii tan ɓe ngartat. Kanko e hoore makko omo hokka waasɓe e jogiiɓe caɗeele jawdi keewndi, kono o wiyi, o seediima ɗum addaani nafoore sabu ɓeen haa jooni ena ngonndi e sokla kaalis. Ɗum noon, ñamlude neɗɗo kaalis yo liggoro ɓuri heewde nafoore e dokkal.
Eɓɓooji « ñamalon » (micro-credit) puɗɗii ko to leyɗeele baasɗe Asii, hono Benglaades. Ko jannginoowo faggudu gooto jėyaaɗo toon, Muhammad Yunus, darjini kuutorgol ñamalon e leyɗeele baasɗe ngam wallude ɓe ngalaa ceede e ko ngollorii. Kannko Yunus o heftinaama wonde ɓurɗo jokkude enɗam e winndere ndee e hitaande 2006 haa o toɗɗaa Nobel wonande njiilawu jam e nanondiral (hitaande fof ena toɗɗee). Ena laaɓi so Yusu ñemmbii Yuunus, e sikke am ko moƴƴere tan njiy-mi heen, sabu Yuusu Nduur anndiraa ko nehdi e anndude haaju mum. Yo Alla yettinan mo eɓɓo ngoo haa miskineeɓe heewɓe mbaawa ɓamtaade heen.
Fooyre Ɓamtaare ina ɓeyda heen: « Alla ina waawi ɗee golle ngonana jogiiɓe heddiiɓe ɓee yeru mo ɓe ñemmbata ngam wallitde lohbe ».
