ɗum waɗi ko ñalnde 2 abriil 2008. E tuma nde jaagorɗe leydi ndi, e nder otooji mum en jooɗɗi, mbirtii tirbinaal ina tiindii boowal laaɗe diwooje ina njaɓɓoyoo Amiiri Kattaar, Siidi wul Siidinaa kam ne ummii tirbinaal, ullii e sooynde. Ko hedde tisibaar yimɓe ɓe teskii wonde ko o dogɗo, wondude e ballal yimɓe heewɓe. Holi ɓeen, ɗum ko naamnal ngal suwaa tawo jaabe. Ko laaɓi e oo sahaa, ina jeyaa e ko walliti mo dogde, yeebaare reennooɓe mo ɓe. Ko jangtaa heen ko ina haawnii. Siidi addaa ko juuɗe mum ina cokraa monotaaji, omo ɓoornii wutte. ɗum ko hedde tisbaar wonnoo. Noddunoo mo toon ko ñaawoowo kalfinaaɗo ko fayti e ownugol, hono Buuya wul Naani. Nde ɓe njettii tan, polisiyee gaddunooɗo mo o, wiyi ina sokli, halfini mo gerefiyee gonnooɗo ɗoon o. Ndeen polisiyee o wirniima tan, gorko gooto naati ɗoon, yaltini kartal mum, holli ɗum gerefiyee o : « ko mi polisiyee, miɗo foti haaldude e ooɗoo neɗɗo, ma mi artiran on mo jooni ».
Ɓooytaani polisiyee deenoowo mo o arti ngam heɓtude neɗɗo mum. Kono tawi Siidi yahii. Nde ñaawoowo o habraa ɗum, laakngal werlaa, nokku o uddaa, alaa jaltoowo, alaa naatoowo, polisiyeeji mbaɗaa e jookli wuro ngoo kala. Ɓooytaani jaagorɗo ñaawoore ari ɗoon. Polisiyee o e gerefiyee oo kala keɗtaa, kam e ñaawoowo gooto, ceedtiiɗo wonde fottii e makko e nder huɓeere he (Palais de Justice), omo haalda e debbo e telefon, ɗoon na wiya mo : « miɗo ni ara jooni jooni ». Oon sahaa noon juuɗe makko kaɓɓaaka, kono omo weelnii coktirɗe ɗe. Polisiyee deenoowo o, biyeteeɗo Baaba kam e gerefiyee o hono Baraahim wul Reggaad e biyeteeɗo Muhammed Ali, ɓe nganndu-ɗaa njiyanoo ma ina njeewtida e makko ko juuti, kanko Siidi, ɓeen nanngaama.
Ñalnde 07 abriil 2008 : Piyanɗe e nder Nuwaasoot
Ko hedde waktu jeegoɓo kikiiɗe : yimɓe heewɓe ceedtiima wonde piyanɗe nanaama e nder wuro Nuwaasoot, laawol fayde Nuwaadibu. Ina wiyee wonde waɗii maayɓe, tawi heen gooto ko polisiyee.
Hedde w 22ɓo e h25 jamma ñalnde 7/04/08 :
Tele Muritani mawɗo o habrii wonde polis yiytii e ñalawma he galle ɗo Siidi wul Siidinaa suuɗii ɗo. Poliseeji i e wonɓe nder galle to pellondirii ko juuti. E wiyde Rajo Muritani, waɗii maayɓe ɗiɗo : gooto e ownooɓe ɓe e polisiyee gooto, gooto e maɓɓe kamɓe ownooɓe ɓe gaañiima. Tele o hollitii ko ina wona hojomaaji ɗiɗi, pellondiral ngal. Kamɓe polisiyeeji ɗi, eɓe uddi galle o haa e sahaa.
Ñalnde talaata 08 abriil 2008
Subaka hannde nde polis Muritani felliti naatde galle juuknoo gila hanki jamma, aɓe njaakorinoo tawde toon jihaadiyankooɓe. Kono, hay mbuubu ɓe tawaani toon : ɓeen ulliima e sooynde ndeke gila hanki ! Ɓe mbaali ɗum noon uddude ko huɓeere mehre; woni, tuuba leppii, liingel maayaani ! maayɓe ɗiɗo e gaañiiɓe 7. So tawii ko oo ɗoo polis halfinaa kisal Muritaninaaɓe, aɓe poti faayde, sibu no Siidi ɓoccitorii ɓe nii e no ɓe ndonkiri marde goomuyel tokosel e nder hare, ina firta ko heewi. Yo Alla daɗndu en e polis men.
Ñalnde 10 abriil 2008
Kulol maayde ina wara ! Hanki 9-04-08, e winndannde men « pellondiral Nuwaasoot, huunde soklinnde », en nduwinooma « yo Alla danndu en e polis men ». Duwaawu o jaabaaka tawo, sibu hannde, e fawaade e kabaaruuji keɓ-ɗen, caggal tisibaar seeɗa, polis uddii galle gooto to leegal biyeteengal Sukuk to Liksaar. Wonnoo e galle he ko sanɗaaji janngooji e Duɗal Lislaam Toowngal (ISERI). Caggal ɗum ɓe pelli ɓe. Saɗnaaji ɗiɗi piɗaa : biyeteeɗo Muhammed wul Ahmed Baabe (duuɓi 22) e Aali wul Mustafa (duuɓi 20). Ɓe njaggii toon yimɓe tato. E wiyde maɓɓe, sukaaɓe ɓe ina njokkondiri e salaafiste en. Kikiiɗe hannde, Ardorde kisal Dowla o heptinii wonde ndee ɗoo fiyannde ko juumre. Ɓe njaafniima sibu suka gooto biyeteeɗo Muhammed wul Talebna sankiima heen. ɗum ina addana en jokkude duwaade haa hannde kadi : yo Alla danndu en e polis men ! Sibu ko wayi nii saabotoo ɗum ko kulol ɓurtungol e ŋakkeende teylaare.
Ñalnde 10 abriil 2008
Maaruuf tawtii Shabarnoo Hannde (10-04-08), naange hoore kellew, Maaruuf wul Habiib, jahdiiɗo Siidi wul Siidinaa, biyetenooɗo woni ko Mali, jaggaama e mbeddaaji Nuwaasoot, to leegal Bagdaad-Socogim PS. O jolnoo ko e taksi, omo ɓoornii melfe. Joom taksi o, nde yiyi mo tan jeertii, ari haa hedde sardiŋaaji Bagdaad ɗo (Centrale chinoise), dartii ngam habrude sehil mum gooto garde. Ndeen Maaruuf faayii ko jogorɗo nanngeede tan, sortii, dogi. Omo waɗnoo gaŋuuji, o itti o werlii, o wiicii ladde melfe ɗe, ɗo o wiyata omo jola e oto ɗo tan, tawi suka gorko gooto wiyii e makko teeɓ, tawi garde o yettiima, ɓe kaɓɓi mo. O nawaa komisariyaa Socogim ɗo, o uddaa ɗoon hade makko naweede bannge goɗɗo. Ina wiyee wonde kanko oo Maaruuf wonnoo mawɗo goomu salaafiyankooɓe warnooɓe tuubakooɓe Farayse e lewru desammbar saraaji Eeleega. Hannde, ina wayi no kamɓe fof ɓe nanngaama haa heddii Siidi wul Siidinaa ɓoccitinooɗo kam ne naange e hoyre kellew e juuɗe poliseeji.
Ñalnde 11 abriil 2008 : Jiytugol kalitooje
Hanki, aljumaa 11 abriil 2008, kaɓirɗe kalitooje keewɗe njiytaama e galle gooto to Tafrak Seyna. E ooɗoo sahaa halfinaaɓe kisal ngoni ko e sunnaade ɓe, ngam anndude holi kañje e hol ɗo ɗe ummii. Galle oo noon, ko kanndanooɗo gila weetndoogo hanki. Won seedtiiɓe wonde rewɓe ina keewnoo yiyeede ina naata galle o; ina sikkaa tan ko suddiiɓe ownooɓe yiyleteeɓe ɓe. Galle o woɗɗondiraani e galle ɗo ɓe njuukanoo haa pellondiral waɗi ɗo. Ɗoon ne « laboratuwaar » kalitooje tawanooma ɗoon. Njiylawu ina jokki ngam yiytude jihaadiyankooɓe dogɓe ɓe e jookli Nuwaasoot kala. Polis wiyi wonde yiytii pele maɓɓe, kono woni ko e ɗaɓɓude kabaruuji goɗɗi ngam waawde haɓde e ownooɓe.
Bookara Aamadu Bah
