Laawol ɗimmol, ñalnde talaata 11 suwee 2013, ko leydi Siin ina nelda debbo nder weeyo, tawi ko ɗanngal maɓɓe weeyo ɓurngal juutde haa e oo sahaa, sibu ko balɗe 15 ɓe mbaɗata toon. O wiyetee ko Wang Yaping. Omo yahra e duuɓi 33. Ɗum fof jeyaa ko e mahngo laana mbeeyoowa koɗeteeka, inniraaka Tiangong-1, potka parde e hitaande 2020. Ngalɗoo ɗanngal woni ɗanngal weeyo joyaɓal koɗangal. Taykonot en ɓee ko tato. Laana nawka ɓe kaa, joofii e hawngo hoɗorde weeyo ɓe tafata ngoo (Canngon), waande no korwal nii, meeteruuji sappo njuuteendi, tati njaajeendi. Leydi Siin nde tawnoo jeyaaka e eɓɓaande «laana weeyo hakkunde leyɗe» (station spatiale internationale) woni ko e mahde ko wayi noon bannge mum gila 2003. Anniya maɓɓe ko nawde neɗɗo to lewru. Ñalnde alkamisa 20 suwee 2013 ndee, kamɓe taykonot en ɓee, to ɓe ngoni e weeyo too, ɓe ndokkii elewaaji Siin, fotde 60 000 militoŋ almuudo, windannde. Rokki winndannde ndee ko debbo oo, e ballal worɓe ɗiɗo ɓee. Ɗumɗoo noon, ko ñeeñal mawngal to bannge karallaagal, sibu to ɓe ngoni too, ko 340 kiloomeeteer woni hakkunde maɓɓe e leydi. Ɓe mbaɗi kadi jarribooji kollitooji hol no kuuje kuuje e yimɓe mbayata e nokku mo alaafooɗo.
Bookara Aamadu Bah
Kelmeendi : Alaa fooɗo : apesanteur
