Steve Jobs ! Mo heɗii rajo, ƴeewi tele walla internet daande ko wootere : Steve Jobs, coso Apple, maayii ! Ndaw ko haani, sibu hannde, ina famɗi mo naforaaki kuutorgal ngal oo ɗoo gorko miijii, waɗti goonga : gila e ordinateeruuji ganndiraaɗi Macintosh, haa teeŋti noon e kuutoragol doombru (souris) ngol ordinateeruuji winndere kala mbattini ñemtinde, haa yettii kuutorɗe biyeteeɗe iPhone (Aayfon), iPod (Aaypod), iPad (Aaypad)…
Steve Jobs sankii ko ñalnde alarba 5 oktoobar 2011 to Palo Alto (Kaliforni to Amerik). Sabaabu nawtuɗo mo oo, ko nguɗu baggol, tawi omo yahra e duui 56 fat !
Maayde Steve Jobs ko kewu mawɗo e nder winndere ndee, haa teeŋti noon wonande karalleeje kese. Barak Obama wiyi “ Steave Jobs jeyanoo ko e fentooɓe Ameriknaaɓe ɓurɓe mawnude ; ko o neɗɗo mo hulaano jogaade miijooji kesi ; ƴoogtiiɗo mo hulaano sikkude ina waawi waylude aduna ; jogiiɗo peelelaagal gaddanngal ɗum yettaade payndaale mum ”.
Steve Jobs wiyatnoo : “ mi yiɗaa wonde neɗɗo ɓurɗo alɗude nder cehe ” walla “ huunde ɓurnde teeŋtude nde ciftortu-mi, addanoore mi suɓaade geɗe ɓurɗe himmude e nguurndam am, ko siftorde ko mi maayoowo jooni jooni ”.
Yo Alla yurmo mo yaafoo mo.
