Lubna Ahmed ko jaayndiyanke debbo. O jeyaa ko Sudaan. O jaggidaa ko e rewɓe 13 woɗɓe e darorɗe lewru sulyee tawi aɓe ngoni nder ñaamirdu (restoraa) to Kartuum sabu “ ɓoorngal ngal senaaki ”, woni pantalon jaajɗo e marñeet (Blouse) mo o ɓoorninoo. Heen rewɓe sappo ñaawaama pawal (amende), lappaa ɓoggi. Lubnaa kañum salii ɗuum, wiyi ko maa yahdee ñaawoore., mbele, e miijo makko eɗum waɗa dille, o huutoroo tirbinaal o ngam suurtude kiiɗal ngal laamu Sudaan fawi e dow rewɓe ngal.
Yimɓe heewɓe mballitii mo e ɗuum, haa teeŋti noon e jeeyngal ngal o ummini mbele sariya jamirɗo “ ɓoggi 40 ”e dow kala “ baɗɗo gollal ngal senaaki, gollal ngal yahdaani e moƴƴi gaadoraaɗi walla ɓoornagol comci ɗi cenaaki ”, mbele oon sariya ina ittee. Pantaloŋ jeyaa ko e comci jaggiraaɗi waasde senaade e nder faamamuya ŋeerɗo sariya Lislaam, mo laamu militeer kumaandan Umar al Bashiir lelni gila e hitaande 1989. Nii woni kanko Lubna o ñaawaa, o fawaa alamaan 200 dolaar, o yoɓa, o woppitee. Kono o wiyi o yoɓaani, sibu ɗuum wayata ko no heɓtinde wonde o waɗii ko boni nii. O salii, o nawaa kasoo. O wiyi : “ mi yoɓataa pawal ngal, ɓurani mi ko yahdee kasoo ”. Ko no o woppitaama janngo mum sibu Fedde jayndiyankooɓe Sudaan yoɓii pawalal ngal. Kono Lubna weltaaki heen sibu o wiyi “ ma min njokku hare ngam ittude oo sariya ”.
Bookara Aamadu Bah
