E binndanɗe men jawtuɗe en njanngii ɗee geɗe : Leydi wertaaki, ene murliɗi no fuku nii, kono ene ɓeppiɗi seeɗa, to wuddu Dow e to wuddu Les ; Ŋorol Peccol ina fecci dingiral Leydi e pecce ɗiɗi mawɗe, potɗe, hono Feccere Fuku Dow e Feccere Fukku Les.
Hannde noon njanngaten ko diidi Leydi teskinɗi, e leppi nguleeki gonɗi e Leydi. Diidi teeŋtiɗi e leydi Paamen noon ɗii diidi njiyetaake, ɗi ngoodaani, ko e hakkille tan ɗi mbaɗaa walla ɗi miijaa, etee eɗi keewi nafoore e nder ganndal leydi e gannde goɗɗe :
Ŋorol Peccol jeyaa ko e majji. Eɗi mballita en waawde ɓetde Leydi, e yiytude majjuɗo, waɗtude majjuɗo e laawol, e anndude nokku kala ɗo woni e Leydi, ekn.
Diidi Leydi teeŋtuɗi (Natal 3) ina keewi sanne, kono hannde njiyaten heen tan ko joy : Ŋorol Peccol ; ŋori nguleeki (2) , Tigille (2).
Ŋorol peccol (2P) : ko ngol gootol, ko diidol murlol, taaringol Leydi, ina rewi hakkunde mayri beƴ. Ko kanngol feccata fuku leydi hakkunde : feccere wonnde dow diidol ngol wiyaa Feccere Fuku Dow, feccere wonnde les nde wiyaa Feccere Fuku Les.
Ŋorol nguleeki ( 2.NG.) : ko ɗi ɗiɗi, ko ɗi diidi murliɗɗi, taariiɗi Leydi, tolnondirɗi dow e les Ŋorol Peccol. Ŋorol nguleeki dow (2.NG.D.) woni ko e Fuku Dow. E nder Afrik ngol fecciti ko leyɗeele joy, Muritani (seeɗa dow wuro Suwoyraat), e Mali, e Alaseri, e Libi, e Ejipte (Egypte). Engol wiyee ŊOROL NGULEEKI KANSEER (Cancer).
Ŋorol nguleeki les (2.NG.L.) woni ko e Fuku Les. E nder Afrik ngol fecciti ko leyɗeele nay : Namibi, e Botsuwana, e Leydi ɓorgo Afrik, e Mosammbik. Kanngol ne, engol wiyee ŊOROL NGULEEKI KAPRIKORNE (Capricorne).
Tigille : ko ɗi diidi : ko ɗi diidi diidi murli. ɗɗi, taariiɗi gulli leydi, to Dow e to Les. – Tigilde dow (T.D.) woni ko to wuddu Leydi Dow. – Tigilde les : woni ko to wuddu Leydi Les. (ƴeew natal) Leppi nguleeki e dow leydi :
So oɗon ciftora, en mbiyiino ko Naange hokkata tagopeeje ɗe nguleeki e fooyre. Ñalawma, cereeli Naange ina ngadda nguleeki, Leydi wula. Jamma, Leydi ɓuuɓtat : ndi yaltintu nguleeki ndi heɓnoo e Naange. Kono nokkuuji Leydi fof keɓdataa keeweendi nguleeki ngooti. Eɗen mbaawi humpitaade ɗum so en njayniima fitirla, maa lampa torso, e huunde murliɗnde no fuku nii ; ma en njiy wonde cereeli ɗi ngonaa gooti e nokkuuji fuku he fof. Naange ina waawi yerondireede e kaa fitirla. Nokkuuji ɓurɗi yayneede e wulde e Leydi ko nokkuuji ɗo cereeli Naange njanata beƴ e mum en : ɗiin ngoni diiwaanuuji gonɗi hakkunde Ŋorol Peccol e ŋori Nguleeki ɗi. Ɓuri wulde fof noon ko nokkuuji ɗo Ŋorol Peccol rewata. Nokkuuji ɗi keewaani yayneede no feewi, walla ɗi keewaani nguleeki no feewi ko nokkuuji ɗo cereeli Naange ngarata e mum en ina palii : ɗiin ngoni ko hakkunde ŋori Nguleeki e wuddu Leydi Dow e Les. Ɓuri ɓuuɓde fof kadi ko nokkuuji gonɗi hakkunde Tigilde e wuddu Leydi (Dow e Les).
E fawaade e ɗum, ummaade Ŋorol Peccol feewde wuddu Leydi, leppi nguleeki ko tati (3) wonande Fuku Leydi Dow, e 3 wonande Fuku Leydi Les: nokku ngulɗo ; nokku ɗo nguleeki eɓuuɓol kakindii ; nokku ɓuuɓol.
Aamadu Umaar Jah
