Seedantaagal e nguurndam Bah Sammba Aamel
Leƴƴannde e nguurndam Bah Sammba Aamel, Sammba gorko mo Teekaan wuro Njaay Kan feewde e jaaynde Fooyre Ɓamtaare.
Bisimillaahi, arahmaani, araahiimi, en puɗɗoriima innde Allah, tagɗo denndaangal binndi e kala ko wuuri woodi, Jom leydi e asamaan, baɗoowo ko welaa ɗo welaa nde welaa eno weliraa…
Catal fedde Ɓamtaare Pulaar e terɗe mum bellelle e goomuuji mum kala, ina ndenndi sunaare e Nuwaadibunaaɓe e fuutaŋkooɓe e Muritaninaaɓe kala e ustaare ngenndiyanke mo alaa guli, hono musiɗɗo Bah Sammba Aamel Sammba, giɗo leñol, giɗo ngenndi e yimɓe fof. Leydi moɗii kaŋŋe kamaa kunnaa, maayde ne ko goonga.
Sammba jibinaama Tooro e cukaagu, waɗi cagataagal mum Nuwaasoot, waɗtini darii Nuwaadibu leydi Saahal, o fuɗi, o guubii, o woni ɓesnooki, sukaaɓe ndarii petti, mawɓe lelii petti.
Sammba Fedde Ɓamtaare pulaar wiyi : pulaar yo jannge jannginee. Sammba mo Distirik wiyi : yo pine ngannde puɗa. So doole ndonkii, doole keɓɓoo.
Sammba mo rajo fm Nuwaadibu wiyi : yo pine e ɗemɗe njulnultondir, Pulaar, safaroore, Sooninke e Wolof, juuɗe cooɗondira nde laaɓa. Sammba mo jumaaji e jamaaji wiyi : mo alaa diine alaa fiɓnde, alaa aadi.
Sammba njaatige fulɓe e fuutankooɓe e ɗanniiɓe e juulɓe kala : galle adii udditanii ɓesngu mum Teekaan, Jaañum, Fanay e Ceelaw ina ceedtii ɗum. Galle udditanii hoɗdiiɓe e hoɗɓe yahooɓe kono hoto doole ɗuum e liyam mum ngoni : Allah ko kañum hokkata mooƴu ndiyam, Sammba hokkaama ndiyam suurii heen haa yahi.
Yo Allah waɗ ndeenaagu, lomtoo, lomtina, ko moƴƴi ñemmbee. Aamiin!
Muusaa Mammadu Bah
hooreejo catal Fedde Ɓamtaare Pulaar, Nuwaadibu
