Ko laamɗo gooto, jiɗɗo raddo noon, goowɗo ɗum kadi. Ñalawma gooto, o suɓii yahde raddo, wondude e sukaaɓe kam e suddiiɓe (rewɓe) makko. Laawol ngol fellitaama ! Kono ko caggal nde o yenanaa kisgol weeye ngo. Ngam omo jogii batula jogiiɗo ganndal to bannge weeyo, kadi oon ko koolaaɗo makko sanne.
Laamɗo diisiniima batula mum, batula wiyi mo : « hannde kay weeyo ngo ina deeƴi haa no feewi ! » wonaa henndu, wonaa toɓo. Ɓe njaltii, ɓe naatii e ladde labaande, sukkunde, yooɗnde. Wondude e hoolaare mawnde ! Ina heewi wi’eede: « woto bon law. » Hono naani e jooni tawi ƴiiwoonde udditii, toɓii, rewɓe e sukaaɓe ina njana e nder ɓakke. Laamɗo seki haa no fewi ! Ndeen ɓe ngartii eɓe naatta e wuro ngo, ɓe njii cuurki ina yalta e suudu, ɓe ngari e mayru, ɓe tawi ɗoon gorko, teenewo ina yeeya. O naamndii gorko oo, hol ko haɗmaa teenoyde hannde ? O wiimo : « miɗo anndunoo hannde weeyo ngo welaani ». Laamɗo oo naamnditiimo wondude e mugeede, hol no nganndirɗaa ? O wii : « ko mbabba am baaɗoo ! somi finii mi arat mi ndaaraba, somi tawii eba darni noppi, mi annda hannde weeyo ngo welaani, somi tawii eba lelni noppi, mi annda hannde miɗo waawi teenoyde, ngam weeyo ngoo ina weli.
Ɗoon tan laamɗo oo yeeƴii bannge mum nano, gite makko pawii e baltula makko, mo hoolii o seedtanii ɗum e anndude weeyo, o wiimo : « mi ittiima e nokkumaa. » O yeeƴii bannge makko ñaamo, gite makko pawii e mbabba kam e noppi mum, o wii geɗe ɗee ngartiraama e mabba.
Ceerno Abuu Bah
