Won ko wonnoo ɗoo. Ina wona, wonataa ko tinndol. Wonnoo ɗoo ko fowru e mbeewa. Subaka law, mbeewa ina ummii fuɗnaange, fowru ummii hiirnaange. Ɓe kawri e nder guumi cukkuki. Mbeewa tinaani, tintaani, fowru tinaani, haa gite maɓɓe mbaɗdi reŋku. Mbeewa wiyi: «Hii, subaka am bonii hannde !» Fowru ndaari mbeewa. Mbeewa ndaari fowru. Fowru wii : «Aaha, hannde kay subaka maa bonii !» Fowru wiyi: «So a haalii goongaaji nay tan, mi accete, mi waasa warde ma». Mbeewa wiyi : «Ñaam am tan, ɗum woni e miijo maa.» Fowru wiyi : “so a haalanii kam goongaaji nay, mi ñaamataa ma” Mbeewa wii: “sinno Alla anndiniino kam aɗa rewa e ngol ɗoo laawol, mi rewataano heen”. Fowru wiyi “ahaa goo, a haalii goonga”. “Ɗiɗaɓel ngel, so mi yahii wuro, mi wiyii yimɓe ɓee mi hawrii e fowru accii kam, ɓe mbiyata ko wonaa gonnga, sibu a alaa nguun ndimaagu”. Fowru wiyi “ɗiɗi, a haalii goonga”. Mbeewa wiyi “tataɓel ngel, sinno joom am anndiniino mi, so oorii hannde miɗo hawra e maa, ko e ɓoggol ñallatnoo-mi”. Fowri wiyi “tati, a haalii goonga”. Mbeewa wiyi “nayaɓel ngel “so a yiyii haala men juutirii nii tan, waɗi noon ko a heyɗaani”. Fowru ŋooɗi jaleeɗe wiyi “nay, a haalii goonga. Jooni jooni conngu-mi ngaari, ñaam-mi teewu haa ngoppu-mi. Yah, mi accii ma !”
Ndiwaa ɗoo, ɗakkaa ɗoo !
