Won ko wonnoo ɗoo. Ina wona, wonataa ko tinndol.
Fowru e njamala meeɗii fewjude yahde cuddungu to gurel fulɓe ina woni oo too bannge maayo. Ɓe ngari haa e tufnde, ɓe tawi laana ina woni oo too bannge maayo. Ɓe njooɗii ha ɓe tampi, alaa fof telliiɗo saka ɓe mbiya ɗum yo addan ɓe laana. Tee ɓе mbaɗtii nande gulaali, bawɗi e buubaaji ina kartoo. Huunde ndee jirwi no feewi, ɓe natti waawde jogaade koye maɓɓe.
Njamala wiyi fowru : “So mi waɗii ɗoo huunde ma a haaltoy ? ” Fowru wiyi : “ alaa, mi haaltoytaa” Njamala itti leeɓol gaɗa mum, itti goɗngol e saayna mum, o waɗi laanel guborgel, ɓe njoli heen, ɓe tacci. Ndeen ɓe njettiima to cuddungu too, ɓe mbismaa no haanirta nii, ɓe cahanaa lacciri, ɓe ñaami ha ɓe kaari. Yimɓе ɓee noon ngari, taarii ɓe. Gooto fof ina naamndoo fowru : “ e cillel haalan min noon laawol maa e njambala, mbar on tampaani? ” Ɓе роɓɓi kelle tan, fowru woni e sajaade ina wiya : “ wonnoo ɗoo, wonnoo ɗoo Kaaw njambala, kaaw njambala ”.
O wiyi omo jokka, njambala ŋaacci mo, o deƴƴi. Yimɓе ɓee mbiyi mo kadi : “e Demmba, haal noon ! Walla ana haaraani ?» Ɓe mbiyi mo : «Fowru haal noon, so ɓooyii kadi min ngaddan maa goɗɗum ! ” Ɓe poɓɓi kelle, ɓe cerkiti bawɗi, fowru woni e amde kadi, ina wiya :
“wonnoo ɗoo, wonnoo ɗoo,
Kaaw njambala, Kaaw njambala,
itti leeɓel e gaɗaaru nduu
itti goɗngel e saaynaaru nduu,
waɗi laanel guborgel guborgel, guborgel !!”
Tan yimɓe njoori jaleeɗe, ɓeydii foɓɓude. Woodi yaltuɓe e cuuɗi ngoni e naamndaade “ ko woni? Ko woni ?… ” Tawi hankadi fowru nattii waawde jogaade hoore mum, jokki :
“ wonnoo ɗoo, wonnoo ɗoo Kaaw njambala,
Kaaw njambala, itti leeɓel e gadaaru nduu
itti goɗngel e saaynaaru nduu
waɗi laanelguborgel guborgel, guborgel ! !”
Yimɓe ɓee ngoni e wiyde “ Eyyoo fowru, eyyoo fowru, so Alla awaɗa waawi yimde, tee aɗa weli daande ! ”
Njambala hersi heen no feewi, ngati yoga e yimɓe ɓee mbaɗtii arde haa e sara makko ina ceknoroo mo. O ronkii ɗoon wonde, o telloyii daande maayo, o fadi toon fowru. Fowru woni toon haa hiirde fusi, tellii tawi njambala ina fadi ɗum.Ɓe njoli e laana mаɓɓе, ɓе ngawƴi haa hakkunde maayo, njambala wiyi fowru : “ aan fowru, kaalden haa nanondiren a haaltoytaa, ngaraa aɗa hoyna mi hakkunde fasiraaɓe am. Tee, miin, ko aan tan mballatnoo-mi. A majjaani kam mi ronkaani juuwde e ngel maayel, mi tacca. No koynir-ɗaa kam hannde nii, mo yiyno maa fof, wontaa ma yiyde ! ” Njambala sorti leeɓon mum, laanel yuwi, fowru yahdi e waraango. Ndiwaa ɗoo, dakkaa ɗoo.
