Umar Al Basiir e Idiris Debi, ndokkondirii juuɗe ndokkondirii juuɗe Sudaan e Caad cinñinii ñalnde alkamiisa 13 mars nanondiral jam, pelliti welditde e moƴƴitinde jokkondiral mum en. Ina e nanodiral maɓɓe, ɗaɓɓirde leyɗe aduna ɗe nde mbaɗata konu hakkunde leyɗe ɗiɗi ɗe. Kamɓe fof noon ko ɓe arnooɓe tawtoreede batu OCI to Ndakaaru. Ina jeyaa e ko addunoo luural ngal, leydi Caad ina yooɓtorii laamu Sudaan wallitde Rebel en (murtuɓe) Caadnaaɓe yannooɓe e laamorgo leydi e lewru saawiyee 2008. Huunde nde soldateeɓe Farayse wonɓe toon ngoongɗini. Ina waawi wiyeede ɗum ko hujja sibu luural e cokor cokor hakkunde leyɗe ɗiɗi ɗe wonaa hikka fuɗɗii. E nder ɗuuɓi ɗiɗi cakkitiiɗi ɗi, Caad e Sudaan siifondirii nanondire jam laabi joy, kono meeɗaa dartinde pelWondire e keerol hakkunde leyɗe ɗiɗi ɗe, ngootiri heen fof ina yooɓtoroo ngoɗndi ndi wuurtude e mum rebel en. Sudaan. Sudaan, leydi Afrik ɓurndi mawnude, ina wondi e caɗeele e pecce keewɗe : pecce diine e pecce leƴƴi e pecce renndo e faggudu, hakkunde juulɓe e kereciyee en, hakkunde Aarabeeɓe e Afriknaaɓe, hakkunde eggiyankooɓe e ñiiɓɓe. Kareeli tati gonɗi toon ɗi ina loowi ɗeeɗoo pecce kala, ɗum yanti e hare kuutoragol ngaluuji tago.
Leydi Sudaan ina wondi e baasal mawngal kam fof noon e jogaade petroŋ. Hare ɓesngu fuɗɗiima toon gila e hitaande 1983, hakkunde juulɓe (rewo) e kereciyee en (worgo). Nde yooɓiima miliyoŋaaji 2 fitaandu. Luure ɗiɗi mawɗe goɗɗe kadi peeñii e daawal hakkunde ngal : bonanndeeji ɗi Konu Dartagol (Uganndaa) waɗata to worgo Sudaan kam e iiñcuru wonndu to Darfuur, ndu nganndu-ɗaa en kaaliino haala mum e tonngooɗe men jawtuɗe.
