Debbo biyeteeɗo Irina Bokova (duuɓi 57) toɗɗaama, ñalnde 22 septammbar, yo won Ɗowowo kuɓtodinɗo UNESCO. Toɗɗi mo ko terɗe jeyaaɗe e Diiso siynoowo UNSECO. Kono ko ñalnde 15 oktoobar batu kuftodinngu ndenndinngu yonaaɓe 193 leyɗe jeyaaɗe e Fedde he, laawɗinta ngol toɗɗaagol. O tampondirii no feewi e kanndidaa Ejipt, sibu woote ɗe mbaɗtaama laabi 5. Ko laawol joyaɓol ngol seemdi ɓee : Irina heɓi daaɗe 31, Ejptenaajo o, hono Faaruk Hosni, heɓi daaɗe 27.
Irina Gueorguieva Bokova jibinaa ko e hitaande 1952 to Sofia, laamorgo leydi Bulgaari (to Orop fuɗnaange). E oo ɗoo sahaa ko kanko jooɗanii leydi makko to Farayse (woni ammbasdeer), kanko kadi jooɗaninoo leydi makko to UNESCO e hoore mum. O janngii to leydi Riisi, to Duɗal Jokkondire Adunankooje Mosku, e to Amerik to Uniwersitee Maryland. Ko o debbo dawriyanke (baɗoowo politik) : o wonii cukko Jaagorɗo geɗe caggal leydi (1995-1997), o wonii kadi jaagorɗo Geɗe caggal leydi, o wonii kanndidaa ngam wonde Cukko-Hooreejo leydi makko e hitaande 1996, o daranii jeyegol leydi makko e dental biyeteengal OTAN kam e Dental Orop. Eɗen ciftina tan wonde yimɓe njeenayo ina mbirgatnoo joɗnde nde.
Ko woni UNESCO e hol golle mum ?
« Jam » o firtaani tan baasgol woodde kareeli. « Jam » o firti ko : bidseeji baɗiraaɗi mahde, kono kay wonaa warde e firtude. « Jam » o firti ko mahaaɗe e sarwisaaji gollotooɗi, ɓeydotooɗi, o firti ko ɓesnguuji gollooji ngam mahde janngo, o firti ko hakkillaajiceertuɗi e bonanndeji e ndoolndoolaagu e miijooji njoftiigu. O firti ko hakkillaaji “ kaɓɓondiral ”. Oon jam ina daɓɓi hormaade ko yimɓe ceerti, ina daɓɓi kaaldigal. Ina jeyaa e ko UNESCO daranii, semmbinde ngaal kaaldigal e wallitde leyɗe aduna ɗee heɓde ƴellitaare duumotoonde to bannge dañal e tabitinde denndaangal muuyaaɗe neɗɗanke, tawa noon ina hisni jeyi yontaaji garooji, haa arti noon e mahgol “ pinal jam ” tuugingal e jojjanɗe aadee e demokaraasi.
Mettere mawnde to Keer
Wonande yimɓe heewɓe, ko Faaruk Hosni fotnoo toɗɗeede Ɗowoowo kuftodindo UNESCO. Ko ɗum tagi, Keer finiri ñalnde 23 settaambar ndee, ko mettere mawnde. Jaayɗe leydi ndi njiyri ɗum ko no “ moojobere leyɗeele mawɗe ”. Wonande Al Ahram ko Dental Amerik e Almaañ e Japon kadi, ko Hosni fotnoo ɓennude. Won ɗeen jaayɗe kadi takki ko “ ngoomuyon yahuud ” en kam e “ malli e penaale ” jaayɗe leyɗe hirmaange. Kono tan, won weltiiɓe heen kadi : Islaamist en. Faaruk Hosni ko “gaño maɓɓe” gila luulndii ɓoornagol “melfe”. Geɗel ɗiɗmel caabingel weltaare maɓɓe ko dañde seede wonde “leyɗe hirnaange ina luulndii kala ko ummii e juulɓe, hay so tawii ko neɗɗo ɓadiiɗo ɗum en ”.
Bookara Aamadu Bah
