Aduna hannde, jaaynde heedaani sara e nguurndam aadee, e leydi, e dowla, e fedde, e gollorgal, e ko nanndi heen – jaaynde noon noddi ko kala ko feewti e nanɗe e jiile, hono rajo, e tele, e jaaynirgol walla ɗereeji binndaaɗi.. Ko ɗuum F.Ɓ.P.M. faamnoo gila e hitaande 1980, waɗi ɗum e ngoƴaaji mum, haa yaltini tonngoode adannde jaaynirgol mum hono FOOƴŋE ƁAMTAAŋE (F.Ɓ.), e Lewru noowaamburu 1980. F.Ɓ. wuurii duuɓi jeetati haa njahdi e naange, tuggi lewru noowaamburu 1980 e tonngoode mum adannde (T° 1) haa e lewru feebariyee 1989 e tonngoode mum capanɗe tati (T° 30).
Nde janngaama, saraama e nder leydi he, e nder Afrik, e Orop, ekon, etee nafii sanne e ɓamtugol ɗemɗe men ngenndiije, e darnde men e haɓde e humammbinnagu e majjere, e sarde gannde, e jokkondirde gollotooɓe e pinal e ɗemngal pulaar kala ɗo mbaawi wonde e jookli winndere nde. E oon sahaa terɗe fedde nde, e cate fedde nde, kam e teelɗuɓe nootiima eeraango fedde nde : F.Ɓ. ŋakkanooka teenooɓe, e wifooɓe, e duñcooɓe. Ko F.Ɓ. dartii gila ndeen haa jooni ko ne, wonaa e sago men, etee waɗii yolnde mawnde ; sikke alaa, eɗum jogii daartol mum, kono en luggiɗintaako heen.
Alaa fof peeje ɗe cakkaaka e dow ɗoftaade doosɗe e sarɗiyeeji leydi ndi, ngam ɓamtude jaaynirgol ngol, kono laamu Moawiya wallitaani, sabu yimɓe mum ŋat tan njaɓɓi heen koyɗe mum en, mbiyi ɗum wonataa. Hannde noon, e fawaade e mbayliigu ngonngu e leydi ndi, F.Ɓ.P.M. ene anniyii yantinde doole mum e doole ɓesngu Muritani fof, kam e pelle laamu e ɗe ngonaa laamuyankooje fof, mbele ɓiɓɓe leydi ndi ene mbellitee to bannge jaaynde, haa teeŋti e jaaynirɗi (binndaaɗi), e rajo, ekon. So ɗum waɗii, eɗen nganniyii, so mbaawka hokkii, wuurtinde F.Ɓ. e ummanaade golle peewtuɗe e nanɗe e jiile goɗɗe.
Eɗen ɗaɓɓi e denndaangal gollotooɓe e pine e ɗemɗe ngenndiyankooje Afrik, haa teeŋti e pinal e ɗemngal Fulɓe, yo ngaddu heen balle mum en : soodde, yeeyde, sarde, janngude Fooyre Ɓamtaare, e neldude ɗum binndanɗe e ɓatakeeji, ekon. E raɓɓiɗinaade paamen wonde F.Ɓ. ko joomnol golle e laawol fedde ndee, ko nokku ɗo pine, e gannde, e jeeyngal, mbaawta sareede, ko kuutorgal mbaawngal jokkondirde teelɗuɓe, kam e juɓɓule fedde ndee e ko wonaa fedde ndee. Ndeen noon ummee, mo woni kala e waare mum, e fawaade doole mum, e kattane mum, e mbaawka mum, sabu waktu teenol heedii, hoto mo heddii !
Hooreejo F.Ɓ.P.M. Aamadu Umaar Jah
