Ko yiytaa koo, ko huunde maantinnde no feewi. Winndaande ndee ko ceedtagol Leopool Sedaar Senngoor, hooreejo gadano leydi Senegaal. О winndi ɗum ko e Wolde Adunaare ɗiɗmere. Ko kelle jeeɗiɗi, ɗo o sifotoo no konuuji koloñaal ngonirnoo nder tuddule gonɗe Farayse, hakkunde 1940 e 1942. Winndaande ndee ɓooyii jooɗaade nder Duttorɗe Ngenndiije to Pari, kono hay gooto anndaano jeyɗo nde. Ende sifoo, cifagol laaɓtungol, no koninkooɓe konu Almaan jaggunoo, nguurdunoo e nder kasooji mum en, walla mbiyen no ndaɗndirtunoo nguurndam mum en, kam e luure hakkunde leƴƴi. Winndannde ndee faananoo ko e dipolomaat en toppitinooɓe wallude yimɓe. Ko bittoowo Almaañnaajo biyeteeɗo Raffael Scheck, yiyti hol mo jeyi winndannde ndee. Caggal nde o yerondiri nde e binndaaɗe goɗɗe, keewɗe, o faami wonde jeyi nde ko Senngoor, tawi ina nanngaa. Ine jeyaa e ko o dalliniri ɗum, jiidigal winndannde ndee e binndaaɗe Senngoor goɗɗe, haa arti noon e jime makko, yeru e yamre wiyeteende “ Hosties noires ”, bayyinaande e hitaande 1948.
Kanko Raffael Scheck, o wiyi “ jotondiral ina maantini hakkunde winndaande ndee e jime makko. Yeru, omo haala heen ko fayti e mareen en, e nder jimɗi makko ina woodi yimre nde o waɗani mareen en, tawi kelme kuutoraaɗe ɗee ko goote. Mareen en ko rewɓe tuubakooɓe toppitinooɓe neldude koninkooɓe Afrik, hono tiraayeer en nannganooɓe koliiji, mbinnda ɗum en ɓatakeeji, nelda ɗum en gaŋuuji e comci ekn … Ɓe mbaɗiranoo ko sukkude yolnde koreeji ɓeen nannganooɓе, ɓe nganndu-ɗaa mbaawaano jokkondirde e koreeji mum en, sabu goɗɗugol (ina ngoni gaa е Afrik) ”.
Leopool Sedaar Leopoo Senngoor, hooreejo gadano leydı Senegaal, binndoowo, Afriknaajo gidiiɗo jeyeede e Akkaademi Farayse
