Ɗuum na toɗɗii huunde e kabaruuji jahooji e internet, ɗi yimɓe heewɓe lollinta e nder dente nannduɗe e Facebook walla WatsApp ekn. Yeru ndeeɗoo winndannde wiyoore wonde to leydi Sawuud « annduɓe ñaawii wonde debbo ko jawdi muuyninoori, kono wonaa « aadee » » (DES SCIENTIFIQUES ADMETTENT QUE LA FEMME EST UN MAMMIFÈRE, MAIS PAS UN « HUMAIN »). Wonaa ko ranwi fof muuɗee !
So a janngii ndee winndannde saaktaande e lowe internet keewɗe, aɗa waawi sikkude ko ɗum huunde woodnde, sibu no janngtoraa nii, wayata ko no joom mum en ƴoogi ko ɗo henii, ɓe mbaɗdi heen kadi nate, ellee ko joɗnde ñaawoore ndee woni ɗoon. Ngannden tan ooɗoo kabaaru ko jalkitoore, o woodaani, no yoga e kabaruuji jahooji e internet, ƴoogaaɗi e « kolce bamɗi ».
Daliilu o woodaani, o idii saakteede ko e lowe internet ganndiraaɗe jalkitgol (parodie) baaɗe no « worldnewsdailyreport.com » hade lowe goɗɗe ganndiraaɗe mawninde kabaruuji ɗi ngoodaani lollinde mo, yeru « journaldemourreal.com » to Kanadaa (jaaynde njalniika) walla « el-manchar.com » to Alaseri.
Ɗum noon banndiraaɓe ɓee, yo njuurnitto no feewi binndanɗe njiyata e internet haa teeŋti noon e Facebook walla WatsApp ekn, hade mum en sarde ɗum en.
