Ɓesngu Muritani wootii ñalnde 11 marse ngam suɓaade potɗo ardaade leydi ndi e duuɓi joy paaɗi ɗi. Yimɓe fof ina kawri ko ngol woni go’o ko yimɓe ina kuccana woote tawi hay gooto waawaa wiyde ko oo walla ko oo gañotoo, nde tawnoo, Goomu kooninkooɓe ngardiingu leydi ndi wonii jaambuur e woote ɗe.
Mbele won mo nguuranii ?
Ko waawnoo heen wonde fof, woote ɗe njahrii no haanirta nii, yimɓe ngootii e nder deeƴre e kellifuya. So mbayliigu waɗii walla waɗaani, Muritaninaaɓe ina poti yettireede ɗumɗoo, nde tawnoo weeɓaani. No Muritaninaaɓe mbayi reerɗude e jam nii ina foti addande ɗum en waawde dañande denndaangal caɗeele mum, to bannge koɗdigal, to bannge nguurndam ekn … safaruuji nanondiraaɗi ko aldaa e fitina, e nder ngootaagu. Ngalɗoo daawal nde taƴtaama. ƴo Alla rokku en, e daawal paangal mawɗo leydi moƴƴo, mo waɗataa heedi heeda, potndoowo denndaangal ɓiɓɓe Muritani.
Seteeji keewɗi, ummoriiɗi leyɗe goɗɗe ngariino ƴeewde woote ɗe : daande ko wootere : “woote njahrii no moƴƴi”. Eɗen mbaawi limtude e ɗiin seteeji :
- sete Dental Afrik,
- sete Dental Orop,
- Sete Dental pelle Aarab ƴeewooje woote,
- sete Lig Arab,
- Sete NDI ƴeewoowo woote,
- sete OCI …
Yeru ɗiiɗoo seedanfaaguuji :
Sokna Greenfield : Cukko gadano kuu- ɓal Dowla Amerik wonande Afrik, hono sokna Linda Thomas-Greenfield mo ngandu-ɗaa ko kañum kadi ardii sete ƴeewooɓe wonande leydi Amerik hollitii ñalnde altine nde daawal compugol demokaraasi e nder leydi Muritani ina hoolnii. ɓoni e ooɗoo sete ko 65 ƴeewoowo (Ameriknaaɓe e Muritaninaaɓe). O wiyi : » woote ɗe mbaɗii e nder deeƴre tee alaa fof ɗo nguyka teskaa heen.
Sokna Isler Biguin : Sete Dental Orop kam ne seedtiima wonde woote ɗe laamu Muritani teskiima wasiyaaji ɓe mbaɗnoo e woote ɓennuɗe ɗe. O wiyi ɗum ɗoon fotaani yejjitinde en wonde yimɓe ɓe ina poti jeertaade, sibu ɓuri himmude ko baɗtugol ngol. O wiyi omo yaakorii wonde maa daawal payngal ngal waɗ pelɓondiral miijooji mbele Muritani ina mbaawa suɓaade e fawaade e dalillaaji peeñɗi. O teeŋtinii wonde sete Dental Orop o ina teeŋtini nde Muritaninaaɓe fof mbaawata wootde e nder wellitaare e nuunɗal e daawal paangal ngal.
Sete Dental Afrik mo ardii M. Benjamin Bounkoulou. « Coftal kam e nehdi e deeƴre nde Muritaninaaɓe ngooti e nder mum nde ina yooɗi min « . O wiyi wonde woote ɗe ina njahri no feewi e kuuɓal.
