Kisal e nder jeɓɓilaare Lislaam, ɗum woni jeɓɓilaare ina yiɗi nguurndam moƴƴam, hormii ɗum kadi, ruttii kadi yiɗni ɗum yimɓe, ko ɗum tagi ɗum ari ko rimɗinde yimɓe ngam ummaade e kulhuli, ruttii kadi feri laawol tawa yeru mum ko wuurtinde neɗɗankaagal fayde e paandaale mum to bannge toowal e ƴellitaare, ko ɗum waawata waɗde mo kanko neɗɗo oo e les ɓuuɓiri kisal e hoolaare.
Helmere Lislaam woni jeɓɓilaare, ko kañum woni ñiiɓirde diine lislaam, ɗum ittaa ko e helmere kisal, ngam so kisal alaa, jeɓɓilaare alaa. So jeɓɓilaare alaa, kisal alaa. Waɗi noon kisal ittaa ko e jeɓɓilaare. So en ƴeewtindiima inɗe Alla capanɗe jeenay ejeenay ɗee, ma en taw heen wootere wiyetee ko kisal. Ndeke, fawaade ɗoo, hay leydi so laamɗo lelnaani e nder mum kisal, laamu mum deeyataa. Kisal noon addata ɗum ko potal ndimaagu ɓesnguuji e kala geɗe nguurndam mum en.
En mbiyii jom oo ɗoo diine e inɗe mum ɗee heen wootere wiyetee ko kisal, waɗi noon ko yimɓe ngoongɗinii ko o ñaawi e ko o diidi e paandaale mum, ndekete noon, oon neɗɗo doondiiɗo oo ɓataake, o roondii ko araaraay kisal, waɗi noon kanko neɗɗo oo, o roondii ko ɗeeyre e annoore e moƴƴere e timmal ɗee ɗoo geɗe jangtaaɗe fof, so laatiima ko ɗum woni yurmeende, ngam joomiraaɗo jom baawɗe oo wiyi : ko miin oo woni yurmeendede walla tuubuya deeƴal.
Ender yeewtere Quraana tedduɗo oo wiyi : “ min neliraani ma so wonaa yurmeende ngam winndere ndee ”. Caggal ɗuum eɗen nganndi hay salminaango juulɗo ittaa ko e innde kisal, ngam so juulɗo tawii juulɓe wiyata ko yo jam e kisal won e mon. Ko ɗuum kadi o jaabetee. So ɗum ɓennii, juulɗo e juulɗo bannɗum mo wonaa juulɗo fof alaa e sago ɓe mbaawa wuurdude e nder winndere ndee. Ngam won ɗo nelaaɗo Alla mo jam e kisal woni e mum oo wiyi : » hono Alla waɗanii leñol am ngol salminaango kisal, ko ɗum hoolaare koreeji men tedduɗi « . Ko ɗum tagi ƴellitaare waawaa aaɓnaade e nokku walla leydi ɗo kisal alaa, ngam so kisal woodii tan e nder nokku, maa Alla renndin ɓerɗe joomum en. Ɓerɗe hoɗduɓe noon so ndenndii, sikke alaa maa Alla waɗ ɗoon yurmeende, ngam nelaaɗo Alla mo jam e kisal woni e mum oo, wiyi : “ Alla ƴeewataa tafngo mon, o ƴeewataa jawɗeele mon e askooji mon, o ƴeewata tan ko ko woni e ɓerɗe mоп ”.
Jibriil Muusaa Joob
