To Senegaal yimɓe fof inan keblanoo pooɗondiral laamu 2012. Abdullaay Wad wiyi ko gonoowo kanndidaa, ngemmbiima haa tiiɗi. Pelle politik luulndo nana kebloo, heewɓe nii kollitii gila e jooni ko wonooɓe kanndidaaji…
Hay renndo siwil nana heblano oo kommbaa mawɗo. Ina jeyaa e ɓeen, fedde rappoor en wiyeteende “ Y’en a marre ” (‘min kaastii’ walla ‘min tampii’ walla ‘min kaaɓii’). Ɓe lelnii tuugnorgal golle biyeteengal ‘Electorap’ ngal alaa ko woni golle mum so wonaa haɗde Abdullaay Wad, jahroowo e duuɓi 85, birgude manndaa tataɓo. Siril Tuure, ganndiraaɗo Cat, kalfinaaɗo konngol diɗɗal ngal wiyi : “Wad so yiɗii ina wawi wonde kanndidaa e hitaande 2017, kono 2012, o waawaa, sibu Doosɗe leydi ina kaɗi ɗuum ». O wiyi kadi: «hare amen rowrowre ko falaade kanndidatiir Wad … amin nganniyii waɗde kiirɗe konngugol kaskilooruuji e subaka piipgol otooji», woni no paamraten “waɗde dille. ”
Ɓe mbiyi kadi aɓe keɓii e wallitde laamu Senegaal rokkitde yimɓe karte mum en woote, mbele yimɓe fof ina ndaña no ngootiri. Aɓe nganniyii kadi hoolkisaade kanndidaaji keddiiɗi ɗii, ɓe nodda ɓe e kuccondire to tele, mbele aɓe kaalana Senegaalnaaɓe tuugnorɗe maɓɓe. Ko noon kadi, e wiyde Fadel Baro, gooto e mawɓe diɗɗal ngal ɓe njogori daɗɗirde kanndidaaji ɗi nde kaalanta yimɓe ».
Hade ɗuum fof, aɓe nganniyii waɗde seppo mawngo ñalnde 11 oktoobar 2011 ngam hollitde mette maɓɓе е kuppugol kuuraa ngol gasataa, bonnugol golle e nguurndam Senegaalnaabe. Ko ɗuum nii jeynoo sabaabu cosgol fedde ndee. Abdullaay Wad noon fodiino wonde, tuggi 30 settaambar 2011, kuuraa wontaa taƴondir e Senegaal. Ɗum noon waɗooɓe politik to Senegaal ndañii haaju, sibu ɓe ndañii aynooɓe !
Bookara Aamadu Bah
