En puɗɗoriima innde Alla, joom yurmeende huuɓtidinnde, caabiiɗo nguurndam, lori heen enɗam, njonngu e jiɗgol. En njuulii e Mohammadu Nulaaɗo mo jam e kisal ngoni e mum, timmoode annabaaɓe.
Nde ɗuum ɓenni, mi salmonii Fulɓe kala to mbaawi wonde. Mi ñaagoniima en Alla jam e kisal. Miɗo yiɗi waɗande en ɗoo yimre Pulaar. Ko Miin Aminata Yaayaa Jah. Miɗo ñaagoo Geno yo nde yahru no haaniri nih mbele banndiraaɓe hino ndaña heen weltaare
Fedde Ɓamtaare Pulaar Muritani
So ruttude teddungal jeyaa ko e fotde
Mi ruttat e ɓee fellitɓe ɓamtude Pulaar.
Caggal jinnaaɓe ko ɓeen yontaaɓe leñol
Wiyeteeɓe Fedde Ɓamtaare Pulaar Muritani.
Gila ko mi boobo, mi nanii golle maa
Ƴaaknu-mi kadi ko e teskaare darnde maa.
Mi faamii ko wonnoo faandaare terɗe maa
Mi humpitiima pellital jaale maa
Mi haalonaama ko woni muuyo sagataaɓe maa
Wiɗtude jannginde e findinde woni fotde ɓiɓɓe maa
Gilo to mbootu daasa lesdi muuɗa kijju-mi alkule ma
Ko e Ceerno am mo Jiinge Jeeri njanngu-mi binndanɗe maa
Ko ndeen ɓernde am feerti e gilli maa
Kaɓantoo-mi ko foolde añɓe maa
Ñaldat-mi ko miijooji maa
Mbaaldat-mi ko koyɗi maa
Njeeɓat-mi ko honinkooɓe maa
Yiɗde am ko yooltude hujjaaji maa
Ñaaƴirat-mi ko tippude renndo maa
Mahaa-mi ko e janngineede ngannde maa
Mawɓe am ko goomu wallidiiɓe maa
Hatanteeɓe fellitɓe e nguurndam maɓɓe kuufiino ngal
Abu Mbarom Gelaajo Bah tiiɗninooma e ƴellitaare maggal
Murtuɗo Joop rokkii ngal geɗal timmungal
Jibi Hammee huɓɓiino fooyre maggal
Abdullaay Sal jannginiii ngenndiyankooɓe maa
Haaruuna Sammba Njaay tiiɗni e semmbinde ɓure maa
Mettu Mammadel yiɗiino ngal haaliino ngal
Bah Sammba Gata ko yarlotiiɗo duysii ngal
So limtaama heewat tiiɗniiɓe e semmbinde ngal
Bookara Aamadu Bah tabini fooyre maggal
Miɗo felliti kala ɓamtoowo ngal ko maa daroo
Mo yiɗi ƴellitaare fedde ndee ko maa tiiɗnoo
Mo gollani ngal goonga teddungal roondoo
Mo ngal ɓurani kala huunde ngaameelo ɓooro
Pullo so welsondiima ngal dimaangu mum yoolo
Donngal giyal tekkere haayre muñde ɗuum weeɓaa
Mawɓe reenɓe enɗam ngoni jaale maa
Haralleeɓe yarlitiiɓe ko calɗi maa
Almuɓɓe softuɗe ko coppi maa
Rewɓe rimɓe reenɓe neɗɗaagu ko faggudu maa
Sagataaɓe saasɓe hirooɓe ko ngalu maa
Wallude kala ɓamtoowo ko fotde maa
Ɗemngal woni daaba leñol
Pinal woni wonki leñol
Yoo geno yaafo yahɓe ɓe ko no ngabbii ngartotaa o yurmo heddiiɓe ɓe ko ko cabbi kaaytataa
Yoo wuur pulaar ɓamtoo fulfulde
Aminata Yaaya Jah
Nuwasoot ñalnde 27 bowte 2019
