Doktoraa «Honoris Causa »ko tiitoonde nde Duɗal jaaɓi-haaɗtirde rokkata neɗɗo maantinɗo, baɗɗo geɗe teskinɗe e nder fannu toɗɗaaɗo. Nde duɗal rokkata neɗɗo oo faayiida, ko maa goomu ngu nganndu-ɗaa woni e mum ko jannginooɓe duɗal ngal ɓurɓe lollude njooɗoo, cuɓoo đum. Faayiida ndee ɗoo tiitoonde, en paamii, fawii kadi ko e faayiida e daraja duɗal dokkungal ngal. Ina wayi no, Yuusu Nduur heɓi ɗoo ko kaaɗtudi faayiida, sibu heewnoo rokkeede mo ko hooreeɓe leyɗe. Sibu kadi ngaal duɗal ko Duɗal Jaaɓi-haaɗtirde Yale, to wuro ina wiyee New Haven, to dowla Connecticut, to dowlaaji Dentuɗi Amerik, nawdeteengal e Duɗal biyeteengal Harvard to Cambridge e nder dowla Massachusett, kam e duɗal Columbia University to New York walla duɗal biyeteengal Berkeley to California e duɗal Princeton to New Jersey).
Yuusu Nduur takkanaa oo galan ko ñalnde altine 23 mee 2011. O wiyi “miɗo weltii no feewi e oo ɗoo faayiida mo ndokkaa-mi. Ina wayi no ko heɓtinde golle am walla ko etii-mi gollaade e nder naalankaagal, kam e loowdi noddoori e muñondiral e nanondiral e jam e nder Afrik e winndere ndee. Wonaa miin tan jeyi oo faayiida, ko ɓesngu Senegaal fof, ko Afrik fof”.
Duɗal Yale jeyaa ko e duɗe ɓurɗe darjude to Amerik e nder winndere ndee kadi. Ngalu maggal ina tolnii hannde e 22,5 (noogaas ee ɗiɗi didi e e feсcere) miliyoŋ dolaar (fotde miliyaaruuji 7 ugiyya), kanngal woni ɗiɗmal e oo ɗoo fannu caggal duɗal Harvard.
Persidaaji leydi ndii keewɗi ndewii e maggal: William Howard Taft (1909-1913), Gerald Ford (1974-1977), George H.W. Bush (1989-1993), Bill Clinton (1993- 2001), George W. Bush (2001-2009) kam e yimɓe darjuɓe ko wayi no Paul Newman. 11 250 sanɗa ina njannga e maggal hannde. Yuusu ndañi ko belaaji ɗiɗi, sibu jom suudu ɓiyiiko biyeteeɗo Biraan oo jibina nii Yuusu taaniraaɗo !
Yuusu Doktoor Ƴoogirde: Seneweb
