Ko limoore Demmba
Meeɗii waɗde sahaa gooto, deppuru yahi haa ari e mbaroodi, endu liilta heege, endu laara yande. Mbaroodi wiyi :
– Fowru ko ngondu-ɗaa, mbaar haɗa selli ?
– Miɗo selli, ko heege tan ngondu-mi !
– Wontii jam ! Mi sikkatno a sellaani, kono haade haɗa selli tan, ko jam.
– Wonaa haa maayi dee, sabu ko mawngal ñawbuuji ngondu-mi !
– Ɗuum yo way no a sellii, sabu ɗoo heege alaa ɗoo ! Nde wonnoo miɗo waawi, kadi miɗo woowi, miɗo jaɓi ! Wulnu ndiyam !
Fowru wulni ndiyam haa wuli. Mbaroodi wiyi :
– So wulii addu.
Fowru junngiti addi. Mbaroodi tiimni heen takkere mum haa ndiyam ɗam uuri ɓellere, fowru yari. Mbaroodi wyi: « miɗo ɗoo ɗaanoo seeɗa, so na’i ngarii pinndinaa mi. Haa seeɗa tan mbeyon peeñi. Fowru taasi mbaroodi hello, ummo jawdi arii. Mbaroodi ƴeesi hoore, sooynii mbeyon, tan wiyi: “tukee maa moree maa ɗum wonaa ñaamdu am ko ñaamdu maa. Mbaroodi leltii wiyi: “ko hoore gayi mbiy-mi ! Haa seeɗa tan bamɗi peeñi kadi, tan fowru tecci mbaroodi hello. Mbaroodi ƴeesi hoore, yiyi bamɗi, wiyi “tukee maa moree maa wonaa ñaamdu am, ko ñaamdu ma”. Mbaroodi leltii. Fowru woni e haamtaade, sabu ko ñaamdu mum welndu no feewi. Kono ndu suusaa yande heen gaa-gaa yamiroore mbaroodi ndii. Ndu fadi haa seeɗa tan ndu sooynii punndi hina nanngondiri hakkunde lesdi e ndoogu. Haa seeɗa hoore ɓuji feeñi, tan ndu ŋeeñti mbaroodi. Mbaroodi ƴeesi hoore, sooynii ɓuji, ñooŋtii, hippii e sara lappol hee, suuɗi. Haa ɓuji ɗii ngari haa ɓadi, ndi diwani heen ngootiri, ndi soƴƴi ƴiyal keeci mayri, ɓujiri joorii e lesdi. Nde punndi huulti, tawi fowru ko sara wonnoo, ina laara ko leefi yana heen. Haa mbaroodi noddi ndu “ara gaay ” ! Fowru ari tawi ɓujiri ine lelii. “Ñaam haa kaaraa”! Fowru ñaami haa ɓurtini. Ko noon, ɓe ngoori haa fowru fayi, no feewi, waɗti ƴeewtaade hoyre mum. Ndu waɗti ɗalde haa mbaroodi ɗaanoo tan ndu wona e fotndude takke mayru e takke mbaroodi ndi.
