samedi, octobre 18, 2025
Google search engine
AccueilƊemɗeEeraango ɗemngal Pulaar

Eeraango ɗemngal Pulaar

Tijjaani Aan – yoo Alla ɓuuɓan ɗum – meeɗiino wiyde : Bone leñol ngol ko neemaade !

Ko ɓuri heewde e maɓɓe, so neemiima tan yejjitii iwdi mum, yejjitii fotdeeji mum e iwdi mum, hulat hay ittande hoore mum e ko jogii koo, hay so ina waɗɗanii ngol heɓde ɗuum. Ko maa ɗiya kedda, nde o fuɗɗoo ɓiirtinde ngol makko ngol. Oo ɗoo ella ko ɓooyɗo teskeede teeŋti e eɓe Alla luɓiri laamu. Ɓe paandittoo e ɗuum ko nuunɗal, tawi noon ɗuum ina woɗɗi limteede e nuunɗal, ɗuum jeyaa ko e kulol reedu tan. Goɗɗum fof alaa ! Tee hay so neɗɗo men laamu oo ɗawii hoore mum, tottii wonɓe ngam yiɗde hisnude jooɗnde mum e laamu, alaa fof ɗo rewata haa daɗa e biyaate e baɗaate. Kadi o ruttoo wontana mo nimsa. Waasde ittande leñol mum fotde walla hulde ittande ɗum fotde ko kulol reedu e cewiram-yeesaagu tan sifortee. Goɗɗum fof alaa.

Kaa ɗoo ngonka ka nguur-ɗen hannde, hono ɗaweede fotdeeji men e laamu, gila to faggudu haa e to pinal, ko jooɗaniiɓe en e laamu tan ɗawi en, woto ngoyren hay leñol gootol ! Ko jannguɓe men, haa e jooɗiiɓe e jappeere, jooɗtoriiɓe so ngittabii fotde leñol mumen, fotde nde laamu laawɗini keɓegol mum, tan palaas mumen yiƴƴortu heen ! Mbele miijo maɓɓe ngoo nii wontaani goonga ? Aahaa kay ! Ina wiyee Muusaa Joob, gonnooɗo mawɗo Dakar yah-ngartaa (Dem-dikka), liɓiraa ko sabu innirii kaaruuji jahooji Fuuta ɗii yah-ngartaa ! Mbele ko goonga, walla wonaa sabaabu nde ɗuum o liɓiraa ? Ko waawi heen wonde fof, duko ngoo heewiino e oon sahaa. Eɗen ciftina laamu e gollantooɓe ɗum, wonde ɗemngal ko ngalu ngu alaa ko foti mawnude. Ko kañum nii woni wonki neɗɗo oo, ko kanngal woni tiiɗndi makko, ko kanngal o yoɓnortoo aduna, o yahrata e mum.

So tawii ɗemngal makko neeniwal ngal waraama, ɗawaama fotdeeji mum, wayi ko no ɗawde neɗɗo oo fotde mum e nguurndam ngonduɗam e wellitaare e ɓamtaare. Hay so en koddirii, e leydi ina waɗi neɗɗo gooto kaaloowo ɗemngal gootal, ko oon gooto heddii e haalooɓe maggal, ngaal ɗemngal ina waɗɗii laamu nguu e daraade no wuurtiniri ngal. Sabu ko ngal ngalu aadeeyankeewu, renndoyankeewu, potngu reeneede, hisneede e wuurneede. Ɗum ko hormaade aadee. So tawii neɗɗo dariima e warde ɗemngal, hono haɗde haaleede e winndeede e janngeede e wiɗteede, oon hiilnanii ko warde leñol no woorunoo. Omo heddoraade faamde no feewi faayiida mo laamu jogii feewde e laamaaɓe. Laamu foti ko waɗtude hakkille e ɓesngu leydi mum fof, ruuɗoo heedi heeda, nuunɗa. Waasa fawde keewal e dow ko sikkata ko seeɗa ! Seeɗa alaa ɗoon boom, so ruttaama e wiɗtooji ɓesngu leydi nuunɗuɗi.

So teskoraama kadi nafooje goɗɗe, paggaaɗe e daartol, e werto leydi, e ɗemɗiyankaagal e ñootondiral leyɗeele to bannge kuutondiral e goodondiral, so en teskiima ɗee geɗe fof, haa e goɗɗe ko wonaa ɗee tan, en tawat, ɗenngal Pulaar ko ɗemngal potngal semmbineede e rokkeede fotde mum timmunde, so tawii kay, oon laamɗo walla ɓeen laamɓe ina njiɗi Ummital Afrik, ina njiɗi jahrugol Afrik e goottiɗingol duunde ndee. Ko ɗo Alla mballinto-ɗen to Arwannde e to Wattannde, eɗen toroo Mo nde O lonnginta laamɓe leyɗeele Afrik faamde faayiida ɗemɗe Afrik, haa e rokkude ɗemngal pulaar fotde mum, ngam goottiɗingol duunde Afrik ndee aamnotaako, tee waawataa laataade ɗoon ngal yaɓɓaa, ɗawaa jojjanɗi maggal e leydi fof. Ɗemngal Pulaar wonaa ɗemngal potngal jinngeede, wareede, kono ko potngal wuurneede, semmbineede e leydi fof, ngam waɗtoyde ngal ɗemngal Ngenndiiji Dentuɗi Afrik !

Dental : TUFNDE JUULƁE
Hooreejo : S.E Alhajji Buubu SANNGOT, macungel Alla, Alla tedduɗo, Jurumdeero Potɗo huleede oo.
Kuɗol : Aamadu Tijjaani Siidi Bintu Shariif, winndiyanke wiɗtiyanke kebloowo heblooɓe.

RELATED ARTICLES

LAISSER UN COMMENTAIRE

S'il vous plaît entrez votre commentaire!
S'il vous plaît entrez votre nom ici

- Advertisment -
Google search engine

Most Popular

Recent Comments