Werlii ngoo eeraango ko dental « Yiɗɓe Liisee Nasiyonaal » mo Nuwaasoot, daraniiɓe wallitde almudɓe janngooɓe hatojinɓe e ballal.
Ekkol Fodee Jaagili ko ekkol laamu gonɗo nder gootal e leeɗe taariiɗe Nuwaasoot, leegal baasngal, pooɗtingal nehaande wuro ngoo, ngal heewaani laabi e mahaaɗe laamu, ɗo baasal yaaji.
Addani mo fooɗtude hakkillaaji maɓɓe, kamɓe werliiɓe noddaango ngooɗoo, ko leefre ɓurtunde almuɓɓe makko, sibu, no ɓe mbiyri, e hitaande yawtunde ndee ko almuudo gooto nder capanɗe jeegom, heɓi ɓennude e kawgel naatgol kolees.
Ɗum noon ɓe njiɗi ko wallitde ekkol oo ngam moƴƴitinde sato mum jaŋde, e ustude baasal tuddinngal toon, dummbungal yontaaji yontaaji sukaaɓe ummiiɓe e nokkuuji baasal, ɓe ngalaa hakke e jaŋde moƴƴere.
Ko ɗum huunde saɗtunde, kono jarnde ummaneede. Ina winndii hikka e ekkol hee 447 almuudo, feccitiiɓe e doge 6 nder tolnooji jeegom ɗii. Duɗal hitaande nayaɓere ndee e duɗal hitaande jeegoɓere ndee, ina mbaɗi gootal heen fof ko ɓuri 100 almuudo. Wonaani nayaɓe tati almuɓɓe mum en njooɗotoo ko e leydi. Alaa fof ballal ummortoo duɗal ngal to laamu ngam coggu kaɓirɗe jaŋde. Amudɓe ɓee ngalaa defte, seernaaɓe ɓee ngalaa defte tuugorɗe, ngalaa kaɓirɗe jannginirɗe ko njannginiri. Ɗumɗoo noon, tonngii sifaa ekkolaaji Muritani e kuuɓal mum en.
E wiyde Dental ngal « Nde min ngari toon gadanol, min teskiima wonde ko ɓuri heñoreede ko ñawndude caɗeele nguura almudɓe ɓee, sibu ko ɓuri heen heewde, so beetawe arii njaltii fooftere adannde (rekereyaasiyoŋ), keewaani artude sibu tawata ko heege jaggii ɗum en. Ɗum noon, ballal amen gadanal min nganniyii ko wallondirde e jiknaaɓe almudɓe ɓee ngam huuɓnande ɓe kacitaari. Ina wayi no ndeen faandaare yettaama e ooɗoo sahaa. Teemedde ɗiɗi mbuuɗu, (20 N-UM) ina waawi soodde feccere loocol mburu baɗangol soos liɗɗi cafɗo. »
Banndiraaɓe, hono oo ekkol dee ina heewi e leydi hee, maa mbiyaa boom ekkolaaji Muritani fof ko nii ciforii.
Bookara Aamadu Bah
