SNIM (Société nationale industrielle et minière) woni Sosiyatee Ngenndiijo Mbaylaandi e oogirɗe, sosaa ko e hitaande 1974 caggal nde MIFERAMAA heɓtaa waɗtaa jeyi laamu. Hannde ko laamu Muritani jogii 78% hoore jawdi Snim, ko heddii koo jeyi ɗum ko juɓɓule kaaliseeje e oogirɗe aarabeeje (ine heen Fades e Bid). Snim ina gollina ko ina 6 400 neɗɗo. Snim woni sosiyatee ɗiɗmo e nder Afrik to bannge gaggitgol njamndi. Ko ɓuri heewde heen yeeyoytee ko Siin e Orop. Daawe mawɗe gaggitgol oogirɗe haayre Kejjaa Idjiil sara Suwoyraat ko ɗeeɗoo :
Ko e hitaande 1935 faraysenaaɓe annduɓe ko faati kaaƴe njiyti haayre Kejjaa ndee, kono ko maa 1951 nde anndaa ende waawi golleede. Miferma sosaa e 1952, golle wiɗto e njiylawu kaalis ngummanaa, mahngo ngoo e gaddugol kaɓirɗe puɗɗaa e hitaande 1960 caggal nde nanondiral siifondiraa e BIRD*. Golle mawɗe ɗee njoofoyi e hitaande 1963, laana njoorndi kaa naati Nuwaadibu ñalnde 12 abriil 1963, laana ndiyam ngadiika rimndude kaaƴe duñi ɗo Nuwaadibu ɗoo ñalnde 27 abriil 1963.
E hitaande 1974 laamu Muritani soodti juuɗe MIFERMA fof waɗti ɗe e SNIM cosaaɗo 1972. E hitaande 1978 SNIM udditanaa heeriiɓe, kono ko laamu jeyi 78,35% juuɗe ɗee.
* BIRD (Banque internationale pour la reconstruction et le développement) ko koppe winndereeje hakkunde 189 dowla. O sosaa ko e hitaande 1944 ngam wallitde mahtagol Orop caggal wolde adunaare ɗiɗmere. O jeyaa ko e juɓɓule tammbiiɗe golle Banke winndereejo (Bank monnjaal), kanko e Fedde winndereere ƴellitaare (IDA) heeroriinde leyɗe baasɗe.
Jaŋde rewɓe e nder Fedde Ɓamtaare Pulaar e Muritani : Juutagol eɓɓaande Manos ɗimmere
Ñalnde 19 oktoobar 2018, FƁPM yuɓɓinii ɗo joɗnde mum ɗoo, kewu juutagol daawal ɗimmal eɓɓaande MANOS. Eɓɓaande ndee ko eɓɓaande jaŋde rewɓe mawɓe e nder leeɗe jeegom nder Nuwaasoot (Arafat, Daar Nayim, Daar El Beyda, Marbat, Riyaad e Teyaaret). Hello 4
Daawal gadanal eɓɓaande ndee wonnoo ko e hitaande 2016 e ballal Manos Unidas e ɓiɓɓe wuro Madrid ngam ɓoorde 300 debbo humanbinnaagal. Ngaal daawal waɗii njeñtudi moƴƴiri sibu, e nder 240 rewɓe winndinooɓe e duɗe 12 udditanooɗe ɗee, heen 119 ɓennii e kawgel joofnirgel jaŋde ndee. Ko ɗuum addani MANOS yamirde Fedde ndee yo heblu eɓɓaande woɗnde ɓe mballita ɗum. Nii woni Fedde ndee lelni eɓɓaande ɗimmere ngam hisnude e tiiɗtinde ko dañanoo e daawal gadanal ngal, ɓiɓɓe wuro JACA (to Espaañ) njaɓi rokkude Manos Unidas ko ina wallita siynude eɓɓaande ɗiɗaɓere ndee. Ko ndeen eɓɓaande woni juutaande ñalnde 19 oktoobar ndee. Nde waɗanaa ko 133 debbo (janngooɓe e huufooɓe). Ɓetkaalis oo ko 15 000 000 mb (heen 2 080 000 mb ko fedde ndee defii ɗum).
Faandaare huftidinnde eɓɓaande ndee ko joñtude rewɓe mawɓe e sukaaɓe wonduɓe e caɗeele to bannge renndo e faggudu.
Faandaare heeriinde ndee ko tiiɗtinde keɓe e mbaawkaaji 133 debbo e suka to bannge taro, e binndol, e hiisa, e njuɓɓudi e huufo.
Njeñtudi ɗaminaandi heen ko tiiɗtingol jaŋde rewɓe mawɓe e sukaaɓe wonduɓe e caɗeele e denndingol janngooɓe ɓee “ngam heblude golle jeñtinooje ngalu, e teelal walla e dental”. Ina ɗaminaa, e joofnirde eɓɓaande ndee, maa nguurndam janngooɓe ɓee ɓeydo moƴƴude, ɓe ɓeydoo kadi wellitaade.
E nder konngol makko udditirgol, hooreejo eɓɓaande ndee yettii almudɓe e jannginooɓe duɗe ɗee tawtoraaɓe kewu nguu, e bismaaɓe ɓee.
Yaakuuba Tañnjaa garannooɗo fedde Caritas (Projet Urbain), gonɗo sabaabu jokkondiral Fedde ndee e Manos, ƴettii konngol ngam hollitde weltaare mum e golle ɗee, e hollitde wonde Fedde ndee ina haandi e ko ɓuri ɗumɗoo kadi sabu darnde mum seedtinde.
Ardii eɓɓaande Manos Unidas ko Hooreejo Fedde ndee, hono Aamadu Umar Jah, kalfinaa jiilgol mayre ko Aamadu Malal Jallo.
Ciimtol Bookara Aamadu Bah
