Eyyoo miin kam, yande hawrii e tellaade, sibu gadii- ɗo haalde o, hono Isaaga, ina wayi no taƴii mbabba e hakkunde.
Ko ɓeydat-mi heen tan, ko miin won seedantaagal seeɗa njiɗ-mi addude : Ko adii fof, nafoore jaŋde nde, ɗum so neɗɗo yiɗii anndude ɗuum yo ƴeew e hoore mum tan nuunɗa, so ƴeewii e hoore mum tan nde njanngi tan ɗemngal koɗal haa gasi, hol ko dañnoo, hol ko faggii, hol ko anndi. E nde jillini heen ɗemngal mum neeniwal, ɓayri ko Pulaar, mbiyen Pulaar o, nuunɗa ƴeewa kañum e hoore mum hol ko teskii e mum : maa waaw anndude nafoore ɗemngal neeniwal, ɗuum alaa guli. So annduɓe kaalnoo ɗum ko e defte, enen kam en keɓii yiyde ɗum.
Duɗal ɗemɗe mbiyeteengal ngal, ngal nafii sukaaɓe janngooɓe, kono ngal nafii kadi jannginatnooɓe wonnooɓe toon ɓe, ko goonga foti haaleede. Kala jannginoowo ligginooɗo e ngaal duɗal, hannde o ina waawi anndude tigi rigi rigi, ko nafi ɗum. Hay ko janngunoo ko ndeen ɓuri faamde. Miin dey bannge hoore am, mi janngii Farayse, hade am waɗtude jannginde Pulaar, ina wayi no ko janngatnoo-mi e Farayse ko, ko feccere fecitinde paamnoo-mi heen, kono nde njanngu-mi Pulaar nde ko ndeen tigi rigi paam-mi ko janngatnoo-mi ko, ko ndeen kadi ɓuri nafde mi. Ɗum ko goonga laaɓɗo cer ! Ɗum waɗi miɗo wiya, won kaalɗo ɗo wiyi : « mi janngaani so wonaa Pulaar »! Iih aan kay a janngii fof, wonaa noon wiyetee. Jannguɗo Pulaar gaynii fofof, alaa ko heddii. Heddii ko aɗa nantina gannde goɗɗe. Alaa ɗemngal loowi ganndal.
Ɗemngal loowngal ganndal woodaani e aduna : ɗemɗe ɗee fof njippii ko mehe, caggal ɗumm moni heen fof jiggoo : ko ɗum tan mbaɗɗen, ko mbaɗɗen ko, koko tawaa. Geɗal ɗiɗaɓal ngal, mi wonataa ɗo gawlo Fedde Ɓamtaare Pulaar, ko ɓuuti hollinii. Ɗum mi haalataa ɗum.
Ella gooto noon kaalat-mi : enen leñol men, mantaten neɗɗo tan ko nde maayi, walaa hawla walaa Ruwaati, ɗum hay gooto duwaaki ɗum. Liggotooɓe ɓe nuunɗee, kaalee ɓe liggiima; ɗum woni goonga o. So ɓe nguurii yo kaale, so ɓe njooɗii yo ɓe kaale, so ɓe tawaaka yo ɓe kaale. Ɗum tan woni njoɓdi maɓɓe heen, ko heddii ko ɓe liggantoo ko koye maɓɓe. ƴarlitaare wiyaande nde wonat heen tan, njoɓdi ndi, njoɓdi ina woodi; njoɓdi wonaa tan kaalis, ko yoɓetee ko ina heewi, tee al hamdu lillaahi ina dañee, ɗum ina heen. Ndeke oon bannge kadi mantude neɗɗo nde to bannge gollal mum yo wood hade joom mum maayde.
Geɗel ɗiɗaɓel ngel, keew-ɗen waɗ- tude hakkille tan ko e coolooyaagal e naalankaagal, won liggotooɓe sabu Alla, e nder suturo, gila dawaa dawi ina liggoo, alaa fof caɗeele kawraani heen, hay gooto siftortaa ɗum en. Won yimɓe nganndu-ɗaa ñalawmayel gootel, piyi wutteeji mum en, mbaɗa mukke mum en ndaasa, ngara mbelna ɗemɗe, gasii, alaa ko haaletee so wonaa ɗuum; ɗum wonaa huunde wallitoore.
So mi ɓennii ɗoon, mi wiya Fedde nde, teskaade caɗeele ina moƴƴi, kono mbiɗtee haa nganndon caɗeele ɗe ko ɗe ngoni : so neɗɗo wiyii heblii jannginooɓe teemedde njoyo, njeegomo, alaa jannginooɓe, hol to ɓe ngoni ? Ɓe njannginaani, hol ko haɗi ɓe jannginde? Ɗoon noon mi ara heen : wiyde ko jande mawɓe, aahaa ko jande mawɓe, kono hol ko ñiklata defoowo, ko cakkudi.
Hol ndiin cakkudi ? En kaalii, en mbiyii wonaa kaalis tan, ko goonga, alaa e sago Fedde ndee kadi ƴeewtoo, haalanooma e Batu Mooɓondiral ɓennungu ngu, fedde nde alaa e sago ƴeewa laawol no wontiri fedde nde wonaa laamuyankoore: a nde waawi ɗaɓɓude balle, so nde dañii, nde wallitoroo heen, wallora heen liggotooɓe heen ɓe : ndeen feere kadi alaa e sago ƴeewee. E raɓɓiɗinaade tan mi wiya ñabbuuli peeñɗi ɗoo ɗi, firataani wonde fedde nde liggaaki : al hamdu lillaahi rabil aalamiina; tee kadi, duuɓi capanɗe tati e fedde, ko cukaagu fedde, wonaa cagataagal : fedde alaa happu, wayi ko no jaŋde nde kaalaten ɗoo ndee nii, alaa happu, moni fof e geɗal mum, rogere men nde ɗigginen, ngartiren koyɗe men ɗe e leydi ndariindi, wonaa tan eɗen koyɗa eɗen mbiya ko nii waynoo hanki, alaa ! 9eewen ko ngandu-ɗa ko tabitta ko mbaaw-ɗen gollaade, tawa so en eɓɓii, eɗen ciyna, wonaa tan eɗen eɓɓa yo wel, alaa !
Hoto mbiyen eɗen ŋaala maayo, en mbaawaa, mbaɗen ko mbaaw-ɗen, taƴen ko kattanɗen, ngaynen.
