Ndee Hoodere Diine jorgornde jalbude haa cay, suppitii ko to Cikkite e nder reedu Fuuta, ko e hitaande 1900. Jinnaaɓe makko ko anndiraaɓe moƴƴere e peewal, hono Ceerno Saydu Alfaa Bah jeyaaɗo Neere e nder Booseya. Neene makko Maama Hawlii Bah ko ɗoon e Cikkitte jeyaa. Ceerno mawni ko e Ganngel nokku Seek Muusaa Kamara. Ko ɗoon kadi o adii waɗde jaŋde makko Alquraana e Sariya, haa hitaande 1918 nde o yalti gadanol ngam ɗaɓɓoyde ganndal (ciftinen kadi ko ndeen hitaande Wuro Madiina Alhajji to Koldaa Sompaa). Kanko Ceerno o rewii he yoga e nokkuuji ngam ɗaɓɓude ganndal, haa o yettii Ngijilon to Ceerno Yero Baal Aan (Rta). Nde oon wirnii, o yawti to Ciloñ Duɗal Ceerno Hammee Baaba Talla (Rta). Oon jogiima e makko hoolaare timmunde haa halfanimo geɗe mum keewɗe, ko wayino Bitik mum ekn, ko C Hammee kadi adii rokkudemo Laawol Tijjaaniya refti kadi ardini mo heen, ko ɗoon e Ciloñ o joofni ganndal ngal Fuuta aadorinoo janngude.
Nde o ummii Ciloñ o ruttii ko ngijilon,caggal mum o yehi Hoore Foonde ko ɗoon o waɗi galle, o waɗi ɗoon duuɓi, ko ɓaawo ɗum o waynii Ceerno Hammee Baaba Talla omo yaha to Mawniiko C Umara Tuure to Koldaa, wonoo ko 1927, ko ɗoon e Koldaa o yiidi gadanol e Ceerno Ahmadu Baro Rta, ɓe ngondi ko Allah haaji, ko ɗoon kadi o yii laawol gadanol Ceerno Alh Aali Caam,tawi ina yaha Daakaa soɓɓulde, o tawtoranooma oon Daakaa, ko ɗoon o adii yiide ngal Dental alliyaŋkeewal.Ko caggal ɗuum o yehi Madiina ngam salminoyde Ceerno Alh Aali Caam, ko oon sahaa o seedii sunna laaɓɗo cer, ko ɗoon o suɓii waynoyaade C Hammee to Fuuta, nde oon Yamirimo o ari o wondinii oon jiyaaɗo Allah Ceerno Alh Aaali Caam, hoɓe ngollaa Sunna laaɓɗo laɓɓinaaɗo, Dewal Allah Cemmbungal, ɓe ngondii ɗoon haa hitaande 1935 nde Ceerno makko Alh Aali fooftoyii, ko adii yahdu oon tawi ko oon ɗaldiima Dental ngal, kono Caggal oon ko balɗe 40 o waɗiɗoon, tawi feeñaniimo o waawata heddaade ɗoon ndeen hitaande o ruumoyi ko Koldaa.
Hono no Kala jiyaaɗo Allah jogorɗo waɗde ko tiiɗi kala, Ceerno Alh Muhammadu Saydu Bah ne heɓii jarabuyeeji tiisɗi, kono ɗuum falaaki mo e ndeen faandaare, nde Seeremɓe makko toɓɓanimo, o fiɓiima e fiɓnde makko haa o yettini ndeen huunde, nde o iwi Koldaa o rewii nokkuuji keewɗi, kanko e wondiiɓe makko, haa ɓe njettii to laamɗo ina wiyee Yero Jeynaba gonnooɗo oon Sahaa to Teemanto, ko oon bismiiɓe kadi wellitiɓe e nokku hee, waɗdimo e gannduɗo ladde nde, ina wiyee Sammba oon ko Baañoowo, hoɓe njiiloo haa ɓe njettii ɗo Madiina Woni hannde ɗo, o faami Allah holliimo nokku oo, ko ndeen ɓe coppi ɗum ko e Jumaa mawka hee woni ɗo o lelii hannde ɗo, Ñande heen koɓe njeeɗiɗo, wonnoo ko Ñande 4 Taaske, ina hawri 27 Colte 1936, ko ndeen o o inni wuro ngo o wiyingo Madiina Tulmunawara, o fawi ngo e Deftere Allah e Sunna Nelaɗo Allah, ko nootiimo ko fof nootiimo ko e dow ɗuum. Ko 1941 ngooroodi Jumaa mawka ka madiina diidaa ; kaan wonnoo ko ɓakkere e huɗo e leɗɗe haa 1955. Jumaa mawka hannde kaa aafaa ko 23 Samwiyee 1970. Ko jiidaani e madiina Gunaas ceerno Muhammadu Saydu Bah sosii gure 65 Lislaam, heen 51 ko e Senegaal 14 keddiiɗe ɗee ko hakkunde Muritani, Gine, Maali, Gammbi e Gne Bisaawo.
Njilluuji Makko 1944 ko to Gammbi o yahnoo njillu Lislaam ngadiingu,1945 o yahi to Bajar e nder Gine Bisaawo,1946 o yahi to Pakkaañi,1946 o ruttii Fuuta ɗanngal juutngal hake lebbi tati rewo e woro hakkunde Cikkitte e Ganngel,1948 o ruttii madiina Alhajji gadanol caggal ciiñcugol makko Gunaas, omo yahdi e ceer,o Ahmadu Baro, o juuroyiima Seek Tijjaani Rta laabi jeetati(8)O hajjoyii laabi tati : 1941-1955 e 1973. Ko kanko sompi ngal Pottital Alliyankeewal Daakaa e 1942 jokku ngal haa e nge Ñallunge, ko nii ooɗoo Jiyaaɗo Allah wuurdi e dow ndii leydi haa Ñande 26 Korse 1980 nde o Fooftoyii, o accii jokkol lobbol, hannde oo Khaliifa Makko ko Ceerno Alh Aamadu Tijjaani Bah jokkuɗo ɗeen golle haa njettii ɗo njettii hannde ɗo. Yo Allah Juutnu Nguurndam khaliifa oo, yoɓamo moƴƴere sabu golle makko.
Kuɗol Ɗaahaa Muusaa Bah
