Lulnde heblo jaaynooɓe yuɓɓinaama ɗoo he Nuwaasot, tuggi 12 haa 13 kawle (oktoobar) 2024. Loowdi heblo goo ko : « kabaruuji pefindaaɗi e ciiri jaayndiyaagal ». Ɗowi heblo ngoo ko Hammee Aamadu Lih jaaynoowo to 2 STV e Aamadu Baro Bah, hooreejo CIJP, ummoriiɓe to Senegaal, wondude e Al hajji Abuu Njaay, gardiiɗo Dakaa TV, Abuu Gay mo Lewlewal communication, Abuubakri Bah toppitiiɗo jokkondiral fedde CIJP, Ɗahaa Muusaa Bah jaaynoowo to Dakaa TV.
Ko saanga w9:30 heblo ngoo fuɗɗii to Batirdu Diiwaan Nuwaasoot. Caggal jaŋde Ɓuraanaa tedduɗo oo, Mbooc Abuu Mariata bismii hoɓɓe ɓee e innde catal CIJP Muritani he gardagol Sooya Wat. Aamadu Baro Bah, udditi joɗnde ndee, anndini faandaare heblo ngoo. Caggal ɗuum, jaaynooɓe ɓee, gooto fof innitii, haali fanndaare mum he heblo ngoo. Hamme Aamadu Lih fuɗɗorii heblo ngoo ko faati he « kabaruuji pepindaaɗi » (Fakes News).
Halima Jagana tawtoraama ñalɗi ɗii e innde HAPA (Huufirde Toownde Jaayɗe Muritani). Ko noon ne wonande jaaynooɓe mawɓe waaɓe no Mammadu Hammadi Njaay lollirɗo Bosko, Kisimaa Jagana, Kaliilu Jagana, Jallo Saydu, Kaali Jallo carɗoowo. Hooreejo Fedde Ɓamtaare Pulaar he Muritani, hono Bokaara Aamadu Bah, heɓii tawtoreede ñalawma ɗiɗmo oo, jubbani tawaaɓe ɓee huunde he nguurndam jaaynde Fooyre Ɓamtaare. Tawaaɓe ɓee mbaawii sompude ɗowgu catal CIJP Muritani e ɗaɓɓaande hooreejo CIJP mawɗo oo. Caggal ɗuum, tawtoraaɓe ɓee ndokkaa seedanteeje tawtoregol heblo.
Rokkaa teddungal uddude heblo ngoo ko jonaaɗo Jaagordu pinal, hono Muhammed wul Abaadi, e tawtoreede Kajjata Maalik Jallo, carɗoowo.
Alasan umaar Mbooc
