Ñawɓe heewɓe ine mbaawi ɗaminaade
Ko meeɗaa waɗde waɗii to Taywaan, so ɓernde ine seŋiree nii he neɗɗo : kippu taywaannaaɓe safrooɓe seŋii he neɗɗo ɓernde nde meeɗaa darataade dillude. Ɗum ko fartaŋŋe wonande ujune keewɗe ñawɓe, fadnooɓe dañaneede ɓerɗe.
Haa e oo sahaa, ñawɓe heewɓe ine ndaɗndiree seŋaneede ɓernde sellunde, ittaande he neɗɗo goɗɗo (maayɗo). Yeru, to leydi Farayse, 1 200 ñawɗo ine padi dañaneede ɓernde woɗnde. Yoga heen ko maayooɓe ko adii nde ndañantee nde.
He aada, so ɓernde ine seŋee e neɗɗo, maa ɓernde seŋoytoonde ndee ittee he joomum, dartinee, horngilee, nde seŋoyee he goɗɗo haa gasa, nde softinee kadi, ɓamta dillude. Ko dartintee koo noon, ine waawi woodaa ko bonni e kette ɓernde ndee ko feewnittaako. Ngol ɗoo noon, safrooɓe taywannaaɓe ɓee kuutorii ko feere haɗoore ɓernde ndee dartaade, wuurnoore ɗum, tawi ine dogna he mum ƴiiƴam ngulɗam, mbaɗaɗam poofam (oxygène).
Ko waɗi to Taywaan koo, dokkuɗo ɓernde oo ko gorko jahratnooɗo e duuɓi 35, cankiiɗo he oppeer hoore. Ɓernde makko ine sellunoo, nde seŋtaa, ngam seŋoyeede he ñawɗo jahroowo e duuɓi 49. Ɗum yahri no ɓuri neworaade, ñawɗo oo selli ɗeɗew !
Ndee feere saaktaa ko he jaaynde ganndal haralleere. Doktoor gardiiɗo gollal ngal wiyetee ko Chi Nai-hsin. Omo ɗaminii maa ndee feere wallu yimɓe heewɓe, o wiyi : « faandaare amen ine newii faamde, sibu ko daɗndude nguurndam, tawa huutorii ko feere newiinde, ɓurnde hoolnaade ».
Kono ndee feere kadi ine hatojini e hoolkisooji goɗɗi hade mum huuɓtodineede. Kono tan, eɗen njenanaa ceŋgol ɓernde dilloore ko daawal kesal mawngal.
Bookara Aamadu Bah
