Germaneau, ganndiraaɗo laaval reedu…
“ Ngoppee haa yawaare laaɓa ” moƴƴaani e baawaaɗo, moƴƴaani kayne e baawɗo. Ngati nde laaɓata nde, tawata baawaaɗo oo maayii, baawɗo oo yooɓiima fiɗtaandu. Holi mo nimsa aranta ? Ellee ko ɗuum ari hakkunde fedde wiyeteende Aqmi e faraysenaajo Miseel Sermanoo ( Michel Germaneau).
Caggal nde maslahaa ronkaa, kooninkooɓe Muritani mbaɗdi junngo e faandu ko e haralleeɓe konu Farayse, pelliti ko yande e sunɓiniiɓe anndiraaɓe Aqmi, woni catal Alqaayidaa e nder Magreb, ñalnde Naasaande weetndoogo. Njangu ngu waɗi ko e nder leydi Mali, 200 km hakkunde mum e keerol Muritani. Maayɓe njeegomo limaama bannge taƴooɓe ɓe, kono hay gooto maayaani, gaañaaki bannge kooninkooɓe ɓee, hono no ɗowngu laamu Muritani holliri nii. “ Min mbarii haa maayi pak Faraysenaajo Miseel Sermanoo, ngam yoftanaade ɓiyɓe yummiraaɓe amen njeegomo ɓe konu Farayse e mo Muritani njooɓii ”, ɗuum ko konngol Abu Musaab Abdul Waduud, gardiiɗo fedde Aqmi nde.
E miijo heewɓe noon, haa e nder ɗowngu laamu Farayse, Sermanoo maayii ko ɓooyi, sabu omo wondunoo e rafi ɓernde etee o gaynii leɗɗe ɗe fotnoo ƴettude e kala sahaa. Mbele waɗde, nde wiyaa o maayii ndee, ko ndeen? Holi ko konngol Aqmi, “ maa ɓernde Farayse huɓɓu ”, firata? Holi to tooke mettere Aqmi jogori haaɗande Muritani e Farayse? Mbele fayndaare Muritani e Farayse wonnoo tan ko yiɗde daɗndude fiɗtaandu Sermanoo? Walla ina soomi goɗɗum? Sermanoo e piɗtaali jeegom njanii, haala heddiima, kono kadi faayre ɓeydiima naatde banngeeji kala. Sermanoo dahaa ko ñalnde 19 Seeɗto 2010 to Niseer. Omo yahratnoo e duuɓi 76 ; Ko e fooftere makko ɗuumiinde (retraite) o wonnoo to nokku makko biyeteeɗo Markusi nder Farayse.
Caggal ɗuum o daranii ko faabaade roofolɓe haa teeŋti e sukaaɓe. O ñiiɓii e Afrik e nder leyɗe Muritani, Niseer e Mali. Omo anndiranoo laaɓɗe reedu, yiɗde wallude, yiɗde jaŋde, e daranaade kaɓde e baasal. Warngo makko jibinii mettere mawnde e leyɗe ɗee kala, haa teeŋti noon to o jeyaa too. Bernaar Kusneer, jaagorgal toppitiingal geɗe caggal leydi, arii hannde Aaɓnde (altine) e nder Muritani. O hollitii, addi mo e leydi he ko daɗɗondireede peeje haɓaade hawjinooɓe ɓee. O ɓeydi heen wonde omo weltii e ummande nde Muritani ummanii waɗboniiɓe ɓee etee, yo faame kadi hare nde wonata ko juutnde.
Waɗde eɗum waɗi faayre tawde kadi Nikolaa Sarkosii nannii en, wonde accataa taƴooɓe ina njaha tan ina mbara jaambuureeɗe amdan. Caggal ɗuum, o hirjinii nde Faraysenaaɓe ndeentotoo Saharaa oo e Saahal ngal. Mbiyen tan baɗte piyanɗe jeereende nde gasdaani tawo.
Maamuudu Malal Gey (Dooro
