Ɗum waɗi ko to leydi Korowasi. Ko boombel gootel, jahrowel e duuɓi 13, muuynungel ɗemngal Korowasi, ngel meeɗaa waawde haalde Almaa (Demngal Almaan) hay so tawii noon ngel fuɗdinooma ekkaade haalde ɗum to ekkol. Ngel faɗɗii waktuuji 24 (balɗe ɗiɗi), ngel fiɗɗitii a ngel haala Alamaa degiiɗo, tee ngel yejjiti haa laaɓi ɗemngal maggel. Habri ɗum dey ko lowre internet jaaynde wiyeteende Daily Telegraph, ñalnde alarba 14 abriil. Jinnaaɓe maggel kollitii wonde ngel fuɗɗinooma janngude Almaa seeɗa, kono e ngel woɗɗunoo waawde ɗum. E ngel janngatnoo kadi defte binndaaɗe heen mbele a ngel yaawa waawde ngal.
Doktoreeɓe Opitaal ɗo ngel safretenoo ɗo mbiyi wonde ɗum ɗoo wonaa huunde aadoraande. Ɓe ngoni ko e ƴeewde cukalel ngel ngam etaade faamde ko kewi ko. Gooto e maɓɓe heɓii wiyde wonde hay gooto waawaa anndude no ngaandi neɗɗo waytata caggal nde joomum ɗifti caggal nde faddii, woni yalti e kallu lahaa. Ɓe mbiyi wonde aɓe njoganii ɗum ganndal binndangal, kono e oo ɗoo sahaa ɓe njiɗaa huuñtude geɗe cukalel ngel. Ndeen ɓooyɗo, so ko wayi nii kewii, “ yimɓe mbiyata tan ko kaawis, alaa ko fawtetee heen ”. Kono hannde “ Ina anndaa ko wayi nii wonaa hannde fuɗɗii, sibu ina woodi ɗo yeruuji ɗo yaltuɓe kallu-lahaa pini ina kaala ɗemɗe goɗɗe, walla nii ɗemɗe Defte, ko wayi no haala Misrankooɓe ɓooyɓe, kono tan min ngoni tawo ko e wiɗtude hade amen haalde heen huunde ”.
