Ɓataake sirriyankeejo (cuuɗateeɗo) yanii e juuɗe Maalde Ngenndiyankoore ngam Kisal demokaraasi. Winndunoo oon ɓataake ko kalifu ñaawoore laamu militeer en, hono Aamadu Tijjaan Baal. O huccinanoo ko e porokireer kuftodinɗo ñaawirde rowrowre (Cour suprême), mbele ina takka yimɓe luulndo kuudetaa meeɗnooɓe ardaade Air Muritani, haa arti noon e hooreejo hilifaaɓe hono Yahya wul Ahmed Waghf kam e Diidi wul Biyye, gonnooɗo «diisneteeɗo» to ardorde leydi ndi. Tonngoode ɓataake o ko «36/2008», o winndaa ko ñalnde 26 oktoobar 2008.
Ina feeñi heen wasiya yo porkireer ɓil heen luuldiiɓe ɓe, tawa noon ɓe kuutorii ko wullitaango yimɓe gollotonooɓe e sosiyatee o. Ina heen kadi wasiyaaji e peeje potɗe huutoreede hoto yimɓe paamde wonde yiyletee ɗo ko luulndiiɓe kuudetaa o. Ina teeŋtinaa heen fayndaare ɓataake o ko hollitde Muritaninaaɓe e caggal leydi wonde ɓeeɗoo luulndiiɓe ko kam en njandini Air Mauritanie. Ɓataake o ina wasiyii nde ɓe kuutortoo nulaaɓe gollotooɓe kam e bankeeji e sosiyeteeji joginooɗi heen kaalis ekn … mbele laamu ngu ina waasa sikkeede ko kam fewji ndee feere, tawa hay gooto waawataa takkude ñaawoore leydi ndi «yiylaade tunwinde» luulndiiɓe kuu detaa o. Ina wasiyaa heen kadi nde porkireer o suɓtotoo ñaawooɓe seedtanaaɓe nuunɗal, tawa ko waawɓe golle mum en, waawɓe hollitirde doosiyee o e sifaa mo hay gooto sikkittaako ko fayndaa heen ko. Tee jeeyngal ƴoƴngal waɗee e nder jaayɗe he, mbele eɗum ɓeydoo nanndude e goonga. Eɗen ciftina tan wonde oo doosiyee ina waɗnoo luural mawngal, sibu luulndo kuudetaa o (FNDD) meeɗaa seerde e wiyde wonde ɗum fof waɗiraa ko yiɗde tampinde luulndiiɓe, ko waɗtude ñaawoore kuutorgal politik. Karallo gooto ko fayti e ñaawoore, waɗii ɗiiɗoo teskuyaaji:
1. «Yahyaa wul Waghf ko kam woni hooreejo hilifaaɓe dagiiɗo o. Ko Ñaawirde Toownde (Haute Cour de Justice) tan waawi ñaawde ɗum. Ko hooreejo leydi tan waawi ittude ndeen haɗre. Oon hooreejo leydi noon nana dummbaa to Lemden ».
2. «Toɗɗii porkireer jooɗiiɗo o ko laamu ngu dagaaki. Ɗum noon kala ko ɓe mbaawi waɗde alaa ŋiima to bannge sariya».
3. « … sinno ko nde jam nde, ko wullittooɓe ɗaɓɓata porkireer, wonaa kay porkireer ina yiyloyoo wullittooɓe … ».
Tengiti ngal dow, ñalnde 11 desammbar, aawokaaji nanngaaɓe ɓe kollitii, e nder yeewtere jaaynde njuɓɓinnoo, wonde «hay gollotonooɗo e Air Mauritanie gooto wullitaki». Ɓe mbiyi wonde kaaɗoo haa la waawaa seerndeede e ngonka politik hannde ka, haa teeŋti noon dummbaaɓe ɓee kala, ko hoohooɓe toowɓe (gardiiɗo hilifaaɓe, Diisneteeɗo keeriiɗo to ardorde dowla, gonnooɗo kalifu). Yanti e ɗuum, «inɗe yimɓe kaɓdiiɓe politik ina cowtaa e ɓataake kalifu Ñaawoore o. Ɗuum ko yiylaade heɓde yimɓe politik ». So artii eko wiyaa wonde waɗi ɓe jaggeede ko won gollotonooɓe e Air Mauritanie ngullitii, ɓe mbaɗii ooɗoo teskuya : «ngoon wullitaango alaa e doosiyee he». Yanti heen, to bannge laawol sariya, ɓeen gollotooɓe ngalaa nii hakke wullitaade. Ko joom en jawdi en ɓee tan, walla Ministeer toppitiiɗo ɗuum o, mbaawi wullitaade. Fawtii heen, to bannge laawol, no ɓe cokraa nii rewaani laawol, sibu wayi ko no jaalɗinde e maɓɓe tuumamuya o gila ɓe ñaawaaka : «balɗe 20 aɓe cokaa, tawi alaa fof wiɗto waɗaa».
Wonande njuknaari huunde e tuumaaɓe ɓe njoɓi ndi (100 miliyoŋ ugiyya) mbele ina mbaawa rokkeede wellitaare e mudda, ɓe mbiyi : «maa neɗɗo wona hooreejo Air Mauritanie fotde 12 hitaande, nde waawaa renndinde 100 miliyoŋ ugiyya, tawa ñaamaani fiftiin e njoɓdi mum. Ɗaɓɓude njuknaari potndi nii, ina wayi no ko jinngande jom en jawdi to bannge ñaawoore».
Bookara A. Bah
