Balɗe sappo e ɗiɗo caggal gartugol maɓɓe e leydi maɓɓe, hol ngonka maɓɓe ? Kamɓe ɓee ɗoo idiiɓe artireede ngam ƴeewndaade, hol no ɓe nguurdi hannde. Min njahanii on to tuddule maɓɓe, e nder nokkuuji tati sara Rooso, ɗum woni tuddunde Tulel, tuddunde Demel Dik e tuddunde PK 6. Ko mim tawi toon ko ina hollita golle ɗe njubbaani hay batte.
Ɗo Tulel ɗo, hedde kilooji tati hade ma yettaade Rooso, min tawi Faatimata Jallo ko ina jooɗii e leeso nayeewo. Ko o diwo. Sukaaɓe makko ɗiɗo, sagataaɓe, min tawi ko kuudiima yiyloyaade golle, ina ngondi e cukalon ɗiɗon tokoson. Min tawi ɗoon tillisaaji tati HCR ina uddii, ina ngoppaa. Faatimata Jallo wiyi min « hay gooto ballotaako ɗii ɗoo tillisaaji so wonaa ɓuuɓnu, sibu nder majji wonotaako sabu nguleeki ». Alaa ko woni e ndee tuddunde so wonaa pooye tati moolinooɓe; kañje kala ardiiɗe ko rewɓe. Kamɓe fof e wuurde e caɗeele teeŋtuɗe, ɓe mbiyi min wonde ɓe nimsaani, ko kamɓe cuɓanii koye maɓɓe artude cuuɗi maɓɓe, e nder gure maɓɓe, e nder leydi maɓɓe. Nde ɓe ngonnoo Senegaal nde, ɓe nguurnoo ko e njulaagu. Ñalnde min njillii ɓe nde, min tawi ko ɓe piɗɗii nguura ka HCR rokkunoo ɓe ñalnde ɓe njettii nde, so ñalnde 29 saawiyee 2008. Min tawi ko ɓe kippi barmeeji. » Nde min njettii nde, HCR rokkii min nguura wondude e 500 mb yontere kala, wonande hoore kala. Min ndañii ɗo balɗe 12, amin potnoo hokkeede nguura gila 5 walla 6 lewru ndu, kono haa hannde hay dara min njiyaani « . Ɗum woni ko Bojel wiyi min. Min njiyaani ɗoon taarorde, ndiyam ko seeɗa, siimtat tan. Jaŋde sukaaɓe bonii.
Demel Deknaaɓe, yeijitaaɓе.
Galleeji tati moolinooɓe artuɓe to Demel Dek alaa no ngoori kam enne. Baasal maɓɓe ina fuŋŋinii. Tillisaaji HCR ko uddaaɗi, ina ngoppaa. Min tawi ko ɓe ɗuhii les huɓeere yannde. Nokku mo ɓe njippinaa o ko jeeyaaɗo ɓe tinaani, ko sañciyee woni heen. Woni ɗo ko tillisa Aliyuun Babu e cuddiiɗo mum hono Huley Caam e sukaaɓe maɓɓe njeetato wondude e taaniraagel maɓɓe. Tilliisa Kummba Caam ina wondi e sukaaɓe mum nayo, mo jom galle mum heddii Dagana, kam e tilliisa Hawaa Njaay ina wondi e sukaaɓe njeeɗiɗo.
Kamɓe ne, nde ɓe njettii nde, ɓe tuusaama tillisaaji e mbajjuuji e leece e barmeeji e arkillaaji e fuurnaají, yantude e kaalis seeɗa. Kono fof gasii. Ɓe mbiyi min “min njahii to HCR, kono ɓe mbayi alaa ko ɓe keddorii”.
Ko PK 6 tunndunde ɓurnde mawnude nde woni. Ko fulɓe ngoni heen. Galleeji jeeɗiɗi. Heen pooye nay ardii ɗum en ko rewɓe maayraaɓe walla diwɗuɓe : Khadi Sih e sukaaɓe mum nayo, Binta Yero e sukaaɓe mum njoyo, Kummba Muusaa e sukaaɓe mum nayo, Mayram Bah e Rugiyatu Aamadu, ɓe ndañaani. Worɓe ɗiɗo : Ibraahiima Yero Soh e jom suudu mum e sukaaɓe nayo kam e Aliu Muusaa Soh e cuddiiɗo mum e sukaaɓe njeeɗiɗo. Kamɓe ne ɓe mbiyi ɓe nimsaani e gartugol ngol, sibu ɗum ittanii ɓe mette maɓɓe fof. Kamɓe ne ɓe ngaynii nguura. Ɓe nguuri tan ko ñebbe e gosi maaro. Caɗeele maɓɓe ɓurɗe teeŋtude ko ndiyam e taarorɗe. Ɗum rewi haa tuddunde ndee kala araa ɗoon ndogu deedi. Ko sabu ɗum addani cafroowo yillaade ɓe (heddiiɓe ɓe ndañaani oon fartaŋŋe).
Ina laaɓi wonde artuɓe ɓe kala (tuddule ɗee kala) ina katojini no feewi e ndiyam e kodorɗe moƴƴe e ɗo sukaaɓe mum en njanngi. Eɓe cokli walleede no ɓe ngollorii ha ɓe mbaawa wuurde.
Majjere e ŋakkeende rewindo
Ko ɓuri haaɓnaade fof, ko kamɓe artuɓe ɓe, ko ɓe humpinaaɓe fof : alaa ko ɓe nganndi e ko janngo resani ɓe. Ɓe nganndaa wonde laamu sosii njuɓɓudi (Agence) potɗo lomtaade HCR e nder lebbi tati garooji dì. Oon kumpa noon ina waɗani ɓe faayre mawnde. Ko laaɓi tan, ko aɓe cokli walleede. Wuurde duuɓi noogaas e caɗeele daayo, wona tumaraŋke e leydi mum, ko huunde mettunde.
Seek Haydara (ɓe njilli tuddule ɗe ko ñalnde aset 10 feebriyee 2008).
Fulo Bookara Aamadu Bah
