Joop Mammadu Aamadu, ganndiraaɗo Sammba Hawoyel sankiima ñalnde aljumaa 21 feebariyee 2014 ɗoo e Nuwaasoot. Joop Mammadu Aamadu ko e hoohooɓe laamu Bookara Aamadu Bah wul Daddaa jeyanoo, sibu o woniino heen jaagorɗo e cili keewɗi, o wattindirinoo ko wonde kalifu nehdi e jaŋde e hitaande 1976 haa kuudetaa 1978. Caggal ɗuum, nde henndu demokaraasi fuɗɗii wuttude e hitaande 1992, omo jeyaa e ardinooɓe fedde wiyeteende AMN jeyaande e pelle cosnooɗe UFD. Caggal ɗuum o seertaani e UFD/EN mo Ahmed wul Daddaa so wonaa e duuɓi cakkitiiɗi laamu Maawiyya. E nder ɗuum, Fooyre Ɓamtaare ina duwanoo ɓesngu makko, yo Alla yurmo mo yaafoo mo, haarna mo Aljanna. Innaa lillaahi wa innaa ileyhi raaji’uun.
Fooyre Ɓamtaare ina duwanoo musiɗɗo Abuu Hammadi Dem lollirɗo Mamma Huley hooreejo catal F.Ɓ.P.M. Likseyba Gorgol sabu sankaare ɓiyum debbo, hono Huley Abuu Dem ɓurɗo anndireede Huley Mamma Huley, cankiiɗo to Ndakaaru, wirnaa to Likseyba ñalnde alet 9 feebariyee 2014. Innaa lillaahi, wa innaa ileyhi raaji’uun.
