Ñalnde alkamiisa 7 duujal (mai) 2026 yeewtirdu Diiwal Nuwaasoot jaɓɓiima kollitgol eɓɓaande ganndiwal nde woowaaka. Ɗuum ko wiiñordu limreeru hesuru wiyeteendu StochArena, waɗanaangu ganndine hasre e sikkuru, saaktanaama yimɓe heewɓe nootinooɓe heen nder nehdi, waɗtuɓe heen hakkile no feewi. Sosi ndeen lowre ko Muhmmadu Faalil Sih, doktoor ko faati hiisiwal. E wiyde makko, StochArena ko tammborde heew-ɗemɗiire he Farayseere (fr), he Pulaar (ff), e Engeleere (en). Kono udditaniinde ɗoon e ɗoon ɗemɗe ngenndiije Muritnai keddiiɗe ɗee, haa nii wonande ɗemɗe afriknaaje goɗɗe.
Doktoor Muhammadu Faalil Sih holliti lowre ndee fof ko he pulaar laaɓɗo, mo jillaani hay helmere wootere farayseere walla engeleere. Huunde saɗnde waɗde sibu yowitii ko e gannde hiisiwal lugge. Waɗde ɗum wonii dallinannde timmunde wonde ɗemngal pulaar ine waawi roondaande miijanɗe ganndiwal ceeɓɗe, lugge, tee engal hattani naatde no haanirta nii nder limrewal.
Hoohooɓe heewɓe daraniiɓe ko ɓooyi ɓamtaare ɗemɗe ngenndiije e janngirgol mum en nder duɗe laamu (ekkol) kam e laawɗingol mum en. Ine jeyanoo heen Bookara Aamadu Bah, hooreejo Fedde Ɓamtaare Pulaar he Muritani (FƁPM), Mammadu Haasi Mbay, cukko hooreejo FƁPM e Aamadu Umar Jah, meeɗnooɗo wonde hooreejo fedde ndee, haa wona seede ko ɓe wallitooɓe kala ko toɗɗii naatgol ɗemɗe nehniije nder limrewal. Gardiiɗo Duɗal ngam Jaŋde e Ɓamtaare Ɗemɗe Ngenndiije (IPEALAN), hono Doktoor Mbuuh Seta Jagana, ine tawanoo kam kewu nguu.
Ko jiidaa e ɗuum, jannginooɓe e wiɗtooɓe toowɓe kam e hoohooɓe renndo ine mbismanoo e joɗnde kadi. Ine heen Porfeseer Soh Sammba, e Mammadu Kaaliidu Bah e Alhuseynu Sih, ko jiidaa e haralleeɓe faggudu wayɓe no Aamadu Umar Bah gollotooɗo he Booñ Winndere (Banque Mondiale) e jom suudu mum sokna Mayram Sal. Sarɗooɓe tedduɓe wayɓe no Kajjata Maalik Jallo e Kaali Jallo, mbaawaano luuteede joɗnde waynde nii toowde e teddude, sabu heɓde fartaŋŋe yiyrude gite mum tigi ndee lowre janngirde e saaktirde ganndine lugge.
Hooreejo FƁPM waawaano waasde yettude no feewi doktoor Muhammadu sabu dallinannde moolanaande nde waɗani ɗoon ɗemɗe Afrik e kuuɓal mum en, e sabu makko kadi teddinirde heen ɗemngal pulaar, sabu naatnude ɗum he limrewal.
E wiyde Muhammadu Faalil Sih, faandaare StochArena ko heɓnude yimɓe fof, haa teeŋti sanɗaaji Afrik, ganndiwe hasre. O witi kadi tammborde ndee ina udditanii ɗemɗe ngenndiije ɗee fof, tee o fadi tan ko dañde yarlitantooɓe ɗuum, ngam alɗinde loowdi puɗɗiindi looweede heen ndii.
Kuutoragol pulaar nder lowre hee maa wallu hisnude ɗemngal ngal, kono kadi maa heblu keɓe ngam ƴoƴre tafaande waawaa janngude heen, wallu kadi janngirgol ɗemɗe ngenndiije ɗee, limrewal.
Keewgol lowre ndee ɗemɗe ine heewi nafoore : gaa gaa ɗemngal pulaar ngal, engeleere ndee e farayseere ndee ndee maa newnan huutorɓe ɓee heɓde loowdi ganndiwal winndere ndee fof, newna kadi cargol hasriwal. Ɗee golle ine kolla wonde ɗemngal nokkuwal ine waawi loowde ganndiwal e limrewal, huunde nde ngandu-ɗaa ko yeru janngirgol ɗemɗe ɗiɗi walla keewɗe dans ekolaaji e duɗe jaɓɓi-haaɗtirde Afrik, ine aaɓnoo tigi.
Ñalawma 7 mee 2026 maa heddo e daartol sabu makko wonde yeru ɗo ganndiwal e limrewal e penal nokkuwal potti, udditi fartaŋŋeeji wonande jaŋde e ɗemɗe. StochArena maa laatoyo kuutorgal moƴƴal wonande wiɗtooɓe, jannginooɓe e sanɗaaji e horsinɓe ganndal, tee hollii no pulaar waawirta wonde ɗemngal ganndiwal, ɗemngal karallaagal e kesam-hesaagu.
E tonngol, ngoo hollito feeñninii wonde jahral yeeso ganndine ine aaɓnoo he nder ɗemɗe ngenndiije. Tee limrewal ko jahdiiɗo maooƴo ƴellitaare majje. He ngaal geɗal, StochArena udditii dame peeje kese wonande jaŋde e wiino e ƴoƴre tafaande he nder ɗemɗe Afrik, tawi e oon sahaa gooto ine udditani denndaangal ɗemɗe ngenndiije.
Fooyre Ɓamtaare
